ANG City Health Office sa siyudad sa Digos nangayo og ayuda gikan sa lokal nga kagamhanan sa dakbayan aron magamit sa pagtambal sa mga nangasakit og dengue.
Nagkinahanglan ang CHO og pundo alang sa ilang kampanya aron mapugngan ang dugang pagkuyanap sa maong sakit.
Gumikan niini, kantidad sa P1.8 milyones ang gipangayo ni Dr. Milagros Sunga, city health officer, aron magasto sa CHO alang sa ilang mga pasyente.
Buot sa CHO nga makapalit og mga fogging machines ug fogging chemicals kay niabot na og 352 ang mga nasakit og dengue sa dakbayan ug 9 niini nangamatay.
Niadtong Huwebes sa miaging semana, gipailawom sa Sangguniang Panlalawigan ang tibuok probinsiya sa Davao del Sur sa "state of calamity".
"We want to purchase additional fogging machines, fogging chemicals and we want to provide additional resources for our manpower para ma-cater lahat ng dengue patients in the this city," ni Sunga pa.
Giangkon sa CHO nga nabalaka sila sanglit halos matag adlaw adunay pasyenteng madala sa ospital tungod kay na-dengue. (Dondon Dinoy)