3 pulis nangilkil, tiklo
TULO ka mga pulis ug usa ka sibilyan nga gipasanginlan nga nangilkil nadakpan sa gihimong entrapment operation niadtong Huwebes sa buntag.
Banda alas 10:30 ang takna sa buntag giplano ang paglusad sa usa ka "composite operation" nga gipangulohan nila ni Police Superintendent Filmor Escobal, hepe sa Regional Inteligence Division (RID-XI), Police Superintendent Alfredo Lupaz, hepe sa Provincial Public Safety Company (PPSC), ug Police Inspector Gil Arobo, hepe sa Hagonoy Police Station.
Mga suspek nga "kotong cops" gihulagway nga nasakpan sa aktong nangolekta og salapi gikan sa mga motoristang nag-agian sa highway didto sa lungsod sa Hagonoy, Davao del Sur.
Giila ang mga nadakpang suspek nga mao sila si SPO3 Carlito Albite, SPO2 Alfredo Timosan, PO2 John Lester Llevado ug ang sibilyan nga si Rhuel Allera, kinsa giingong gigamit sa mga pulis isip ilang bata-bata.
Nakuha gikan sa posisyon sa mga suspetsado ang gigamit nga marked money sa mga pulis nga 4 ka tag P50 ug usa ka buok P100 nga nibalor ngadto sa P300.
Sa dugang pagsusi sa kapulisan, nakuha gikan sa posisyon sa mga dinakpan ang 17 ka tag P20 ug tulo ka tag P50, nga ni-total og P490. Ang maong kantidad gibutang sa pribadong sakyanan nga Toyota Revo, kolor silver gray, nagbaton sa plakang LEW-394 nga iya ni Timosan.
Nakuha sab gikan kanila ang kalibre .45 pistola (Itacha) nga iya ni Timosan, .45 kalibre (Norinco) nga iya ni Albite ug .38 rebolber (Armscor) nga iya ni Llevado.
Ang mao nga operasyon gigamitan og surveilance camera ug gisaksihan sa mga sakop sa media aron masakpan gyud ang mga gikatahapang mangilkilay'ng pulis kinsa kadaghan na gireklamo.
Usa ka asset ang gigamit sa kapulisan sa rehiyon aron mogamit og way plaka nga motorsiklo kinsa gidakop sa mga suspetsadong pulis.
Nakig-negosasyon niadtong tungura ang asset nga ilang gidakop ug didto na naaktuhan sa surveilance camera nga gipahug sa 3 ka mga pulis sa kalsada ang gitunol nga marked money.
Nahitabo pa ang ginukdanay samtang nisuway unta pagdagan ang mga sakop sa Highway Patrol Group apan naapsan gihapon sila ug way kaluoy nga giposasan.
Mga suspetsadong pulis gipadlak gilayon sa selda sa Hagonoy police ug ang ilang sakyanan gikostudiya sa kapulisan samtang gihan-ay ang kaso nga ipasaka batok kanila.
Dugay nang gireklamo ang mga kotong cops nga nagabiktima og yanong drayber sa Davao del Sur mao nga gi-plastar sa ilang kauban ang operasyon batok kanila.
Nagdumili paghatag og pamahayag bahin sa pasangil ang mga nasikop nga mga pulis apan gihan-ay dayon ang kasong "direct bribery" sanglit ilang gilapas ang Article 216 sa Revised Penal Code.
Gawas sa maong kaso atubangon sab nila ang kasong administratibo ug kon mapamatud-an hayan mataktak sila sa trabaho. Hinuon, moagi pa kini og preliminary investigation.
Gibutyag ni Regional Police Director Pedro Tango nga hugot karon ang ilang kampanya batok sa mga kotong cops.
Nahitabo sab kini human gimando ni Presidente Benigno "Noynoy" Aquino III ang tinud-anay nga pagsulbad sa mga nalambigit sa anomaliya sa iyang kagamhanan.