TAGBILARAN CITY - Knockout nga kadaugan maoy nalantawan ni kanhi World Boxing Organization (WBO) Oriental champion Z “The Dream” Gorres ngadto sa iyang mga stablemates nga si AJ “Bazooka” Banal ug Jason Pagara kinsa makigsangka sa ilang tagsatagsa ka mga langyawng kaatbang karong gabii sa Carlos P. Garcia Complex.

Giulohan og “Sandugo – Labanan ng mga Kampeon,” si Banal (21-1, 17 KOs) makigsinukliay sa iyang kumo batok sa superflyweight champion sa Korea nga si Big Yoo (16-2, 11 KOs) alang sa nabakanting WBO Asia Pacific Bantamweight championship.

Updates on President Benigno Aquino III's presidency

Samtang ang batan-ong Pagara (18-1 10 KOs) mosuway usab sa katakos sa mas taas ug solido usab nga si Kim Young Bin (10-1, 7 KOs) sa supporting bout nga gituohan nga maoy mokawat sa atensiyon karong gabii.

“Pulos man lig-on ang kontra, pero tan-aw nako ma-knockout gyud na nila.

Grabe man ang preparasayon nilang AJ (Banal) ug Jason (Pagara),” matod ni Gorres kinsa personal gayud nga mitan-aw sa tinimbangay kagahapon sa Island City Mall uban sa iyang asawa nga si Datches.

“Paminaw nako matumba na nila ari na sa 7th round gyud. Sa tinimbangay kagahapon, si Banal nisubra og ¼ lbs. sa ilang 118 lbs. nga weight limit samtang si Big Yoo mitimbang lang kini og 117 ¾.

Hinuon dali ra kaayo kini nga nakuha ni Banal sa ikaduha niyang pagpatong sa timbangan.

Sama kang Banal, ni-overweight usab si Pagara human kini mirehistro og 139 lbs. sa ila untang 138 lbs nga away.

Si Kim yanong nakakuha sa iyang timbang nga 137 ½.

Apan bisan pa sa maong deperensiya wa ipanumbaling sa Koreano ang bintaha ug miuyon kini nga di na lang magpa-reduce si Pagara.

Si James Bacon, ang lain usab nga pambato sa Ala Boxing Gym mitakdo sa 130 lbs. samtang si Eric Macas sa Lanao del Norte mikuha sa timbang nga 130 ½ lbs.

Gikahibulong sa kampo sa Ala ang pagpakahilom ni Big Yoo bisan pa man sa pagsukitsukit sa mga media.

Gituohan nga di gyud gusto nga magpadisturbo si Yoo ug grabi kaayo ang concentration niini sa iyang away.

“Mura’g dunay sekreto aning awaya, kay di man gyud padisturbo.

Bisan kinsay mangutana moingon ra man og no comment,” matod sa trainer ni Banal nga si Edmond Villamor.

Si Edito Villamor, maguwang ni Edmond, mibutyag nga fighter gyud si Big Yoo sigon sa iyang nakita sa video.

Matod ni Edito nga di gyud angay kakompiyansaan ang Koreano tungod kay gawas nga mas taas kini aduna pa gyuy kusog.

Sukwahi sa kontra ni Pagara kinsa yano kaayong nanganti atubangan sa mga

media.

Pinaagi sa iyang Canadian nga asawa nga si Amy Berezowski-Kim, si Kim Young Bin mipabuhagay nga tulo ra ka round iyang patikangkangon si Pagara.

“My husband is very well prepared for this fight. 100 % he will win by knockout. He said in three rounds. If you look at his record, he had a high percentage of winning by knockout,” matod ni Amy kinsa aktibo usab nga boksidor didto sa Korea.

Personal nga mi-supervise sa tinimbangay kagahapon ang representative sa WBO nga si Leon Panoncillo, Dr. Nasser Cruz, Rolando Mendoza sa Games and Amusement Board ug sa amahan ug anak nga si Tony ug Michael Aldeguer sa ALA Boxing Promotions.

Ang nahisgutang boxing promotion giabagan sa City Government of Tagbilaran Bohol ubos sa liderato ni Mayor Dan Lim, Ala Boxing Promotion ug Bohol Sandugo Foundation, Inc. ug ingon man ABS-CBN nga maoy official television network sa event.