NASUGMAK sa grabeng kasaba ang hepe sa PAG-ASA (Philippine Atmospheric and Space Administration) Prisco Nilo gikan kang Presidente Benigno Noynoy Aquino III human, sama sa naandan, mikagar na usab ang ilang forecast sa mamahimong agianan sa bagyong Basyang nga wala lang nagbilin og dakong kadaut sa Metro Manila ug sa National Capital Region kun dili mikalas usab og 26 ka mga kinabuhi nga posible pang mosaka kay daghan pang mga missing ang wala pa usab igkita hangtod ning pagsuwat ning akong lindog.
Sa kapungot ni Noynoy iyang gipahimangnuan si Nilo nga dili na makatugot ang iyang administrasyon sa susamang palpak nga impormasyon sa panahun nga adunay lagyo kay kini magbutang sa alanganin sa kinabuhi sa katawhan.
Apan ang kamatuuran mao nga ang atong nasud anaa nahimutang sa typhoon belt zone kay nag-atubang man kita sa Pacifico pero ang atong Weather Bureau walay saktong kahimanan og technological know-how sa mga kalambuan sa meterology sa hinungdan nga walay paigong budget kining maong ahensya. Mao nga bisan og kusahuson pag kasaba ang mga nagdumala niini ug ilisdan sa matag palpak nga trabaho, kining maong reaksyun dili mahitabong makasulbad sa karaan pang Mampor nga problema.
Ang kinaiya sa bagyo nagkinahanglan og kumplikado nga pagtuon kay daghang mga variable ang maka-impluwensya sa mamahimong gikusgon ug subayong agianan niini. Mao nga dili lamang gamit ug kahimanan ang gikinahanglang mahuptan, apil usab niini ang padayon nga pagtuon og practical applications apan subo kaayo nga dinhi sa ato, ang atong mga weather scientists man kuno igo dang tigbasa sa weather bulletin nga dili pa nila hinimo kay mag-agad pa sa kauluhan nga utro usab nga nag-antos sa mantinil nga sistema.
Hinungdan nga dili na bag-o alang kanato nga adunay giisang public storm signal ang Pag-asa apan nahibulong ang tanan kay pwerte mang inita sa pagsidlak sa haring adlaw. Ang mas kuyaw nga kapalpakan mao ang pagsulti nga ang lugar nga dili maagian mao na hinuo’y kuso-kusohon sa hangin ug ulan o ang estimated time of impact mag-una kay sa sa gipahibawo sa PAG-ASA.
Ang ensaktong impormasyon makahatag og higayon sa pagpangandam sa katawhan ug sa kagamhanan ug pinaagi niini mamahimong kalikayan ang dakong kadaot sa kinabuhi ug kabtangan.
Samtang sayon ang pagtumbok sa pundo nga maoy unahon sa kasamtangang admininistrasyon sa pagahin alang sa atong Weather Bureau Modernization nga matod pa ni Senadora Loren Legarda nagkinahanglan og P5 bilyunes nga allocation.
Ang mosunod natong kumbatihon mao ang mamahimo na usab unya nga kakuhaan og tinubdan alang sa maong lain na usab nga galastuhan sa gobyerno nga naputos sa biniling binilyong alkanse ni Gloria Arroyo.
Ang nakapait ning maong kabilin nga problema sa buhatan sa PAG-ASA kay gikan karong buwana hangtud sa pagtapos sa tuig, gipaabot nga dili gyud kapugngan ang pagsud sa dugang pang mga bagyo hinungdan nga angay dalion ang paghatag sa solusyon apan unsaon man kini sa pagpahigayun kon magkinahanglan pa man og panahon ang pagtigum og pundo. Mao nga sama sa naandan, ang bugtong mahimo sa katawhan mao nalang gyud ang pag-antos ug tinagsang pagbalikas, yawat pagpahungaw sa walay kahimuang kahimtang.