DAGHANG department heads sa Cebu City Hall ang nagdumili sa pagluwat og pamahayag tungod kay giingong gidid-an sila ni Mayor Mike Rama sa pagsulti.
Apan matod sa mayor, wa siya magdili sa mga opisyal sa pagsulti apan, nipahimangno siya nga silay manubag sa linugdangan unya sa ilang gipangsulti.
Matod ni Mike, siya ang boss.
Di sab ni angay ikahibung kon ang mayor pintok sa iyang pagsulti nga siya ang boss.
Kay baya dihang bise-mayor pa siya, daghan ang nag-ingon nga itoy ra gyud kaayo siya ni kanhi mayor ug karon Kong. Tomas Osmeña.
Diha ganiy higayon nga giingong bisan palayaton pa siya ni Tomas, di siya magpanuko sa pagtuman. Mangutana pa siyag asa nga floor siya manukad.
Ning siya na ang mayor, duna dayoy mga pamahayag si Tomas kalabot sa polisiya nga gipatuman ni Mike.
Matod sa kanhi mayor nga kinahanglan transparent si Mike ug di did-an ang mga department head sa pagluwat og mga pamahayag.
Wa matarog ang mayor. Niingon siyang wa niya did-i ang department heads sa pagsulti atubangan sa media.
Tingali gusto sa mayor nga di sila magpataka sa pagsulti aron di sila manubag kon kini mapalpak.
Si kinsa may di mahadlok kon ingon ini ang pahimangno sa mayor? Mas maayo pang motak-om aron malikay sa sayop.
Mao gihapon, ang pahimangno maisip sab nga bahad.Kon gipakita man sa mayor nga di tinuod nga itoy siya sa kanhi mayor, ang imahe nga iyang napintal di maayo kay nasusama siyag arogante.
Di sab tanang detalye, bisan gamay, iyang mahibaw-an. Mas maayo sab nga ang uban iyang itugyan sa nahingtungdang opisyal.
Di na kinahanglan pang isulti sa mayor nga siya ang boss. Anha ni sa buhat ipakita, di sa sulti. Di ba, Boss?