GIPANGAYO nga umento sa mga mamumuo sa Central Visayas kusganong gibabagan sa management sector.
Si Director Elias Cayanong sa Department of Labor and Employment (Dole), chairman sa Regional Tripartite Wages and Productivity Board (RTWPB), nitug-an nga wa pa gyud sila makakab-ot sa kantidad nga usbaw tungod sa daghang oposisyon.
Nniadtong Huwebes, board meeting sa wage board nga gipahigayon sa dakbayan sa Dumaguete aron usab paghatag og kahigayonan nga madungog ang tingog sa labor ug management sector sa Negros oriental.
Matod ni Cayanong nga daghan sa mga kompaniya ang nihangyo og moratorium.
Apan, matod ni Cayanong nga di lang ang tingog sa management ang ilang paminawon maong ila gyung timbangon og maayo ang ilang himuong desisyon.
Bisan pa sa kusog nga pagsupak, gipasalig ni Cayanong nga dili gyud ma-disadvantage ang labor sa himuon nilang desisyon.
Paninguhaon usab sa wage board nga ilang matuman ang gihatag nga “self-impose” deadline pagpagawas og desisyon sa di pa matapos ning buwana.
Kahinumdoman, ang Alliance of Progressive Labor (APL) uban sa lain pang labor groups niduso og P135 wage adjustment.
Ang Associated Labor Union (ALU-TUCP) nangayo og P100 nga umento sa sweldo niadtong Marso ning tuiga.
Naandan na usab nga mas ubos gyud ang madawat nga umento sa Central Visayas itandi sa NCR kon duna may ihatag nga usbaw sa suholan sa rehiyon, hayan di kini molabaw sa P22. (CPL)