WA mapahigayon ang arraignment batok sa anak ni Talisay City Mayor Socrates Fernandez kagahapon nga nag-atubang sa kasong illegal possession of firearms and ammunition ug kalapasan sa Comelec gun ban.
Nadugay usab sa pagtuki si Regional Trial Court (RTC) Branch 5 Judge Douglas Marigomen sa kaso ni Joavan Fernandez kay dugay kaayo siya nga niabot sa korte.
Ang wa pagpahigayon sa pagbasa kang Joavan sa giatubang niyang kaso human ang prosekusyon nagtinguha nga buwagon nila ang kaso nga ila nang nasang-at.
Buot nilang tagsa-tagsang atubangon sa kontrobersyal nga anak ni Fernandez ang kasong illegal possession of firearms and ammunition ug ang kalapasan sa Comelec gun ban.
Niini, si Marigomen nimando sa duha ka mga habig nga mosumiter sa ilang tagsa-tagsa ka mga memorandum alang niini sud sa 30 ka mga adlaw.
Gikatakda ang arraignment ni Joavan alas 9 sa buntag kagahapon apan pasado alas 10 na siya niabot.
Makaduha ka mga higayon nga gitawag ni Marigomen ang kaso.
Dihang gitawag sa huwes ang kaso, si Atty. George Bragat, abogado ni Joavan, nipahibawo nga ang iyang kliyente nagpaingon pa sa korte gikan sa dakbayan sa Talisay.
Kabahin sa tinguha sa prosekusyon nga duha na ka mga kaso ang ipasaka batok sa iyang kliyente, si Bragat niawhag gilayon sa korte nga di una ipahigayon ang arraignment kagahapon.
Nitataw siya nga di una basahan sa giatubang niyang kaso si Joavan kay mosumiter pa man siyag memorandum ning tinguha sa prosekusyon.
Sa iyang bahin, si Talisay City Assistant Prosecutor Floralil Albert namahayag nga pasakahan nilag duha ka mga kaso si Joavan sa usa ra ka kaso nga maoy ilang nasang-at karon.
Si Albert nipasabot nga gikinahanglan nga duhaon nila ang pagpasaka sa kaso isip pagsunod sa “practice” sa Department of Justice (DOJ).
Nitataw siya nga gikinahanglan kini kay di mahimo nga ang duha ka mga “special” nga balaod mahimo nga usa ra diin gitumbok niya ang Republic Act (RA) 8284 ug Batas Pambansa 881.
Nidugang siya sa pagpasabot nga kon ang usa ka kaso ibasura, sama ra usab kini nga mabasura ang laing kaso.
Niini, gikatakda sa Septiyembre 17 ang pagpahigayon sa arraignment sa kaso ni Joavan.
Kining giatubang nga kaso sa kaso ni Fernandez tungod sa giingong pagpanion niyag di lisensyadong armas sa negusyante nga si Vincente Castrodes diin nagkalalis sila sa problema sa trapiko.
Kasamtangang gawasnon karon si Joavan ning giatubang niyang kaso human nipiyansa og P160,000. (JECT)