GIPANGKASUHAN na ang tulo ka mga pulis ug ilang bata-bata human naaktuhan nga nangilkil sa mga motorista didto sa national highway sa Barangay Guihing, lungsod sa Hagonoy, Davao del Sur.
Dungan niini na-relieve na sab sa ilang puwesto ang mga suspek kinsa nakuhaan pa gyud og video sa ilang ilegal nga binuhatan, Huwebes sa buntag.
Nag-atubang karon og kaso sila Senior Police Officer 3 Carlito Albite, SPO2 Alfredo Timosan, PO2 John Lester Llevado ug ang ilang bata-bata nga si Rhuel Aller, kinsa maoy tigpamunit sa ipanglabay nga kuwarta gikan sa mga motorista.
Kasong "Direct Bribery" ug nakalapas sa Anti-graft Practices Act of 2002 ang giatubang sa mga dinakpan.
Apan mamahimo pang makaangkon sa ilang temporaryong kagawasan ang upat kon makabayad kini sa piyansa nga tag P40 mil matag usa.
Si Inspector Gil Arobo, hepe sa kapulisan sa Hagonoy, Davao del Sur, nikanayon nga nakalapas ang mga suspek sa Article 210 sa Revised Penal Code.
"It falls under the revised penal code on article 210 which is direct bribery," niya pa.
Dismayado sab si Regional Highway Patrol Group Regional Director Gregorio Pimentel, tungod sigun niya, matag adlaw niyang ginapahimagnoan ang iyang mga sakop nga dili mangutong.
"We need to clean our ranks on this personnel who are involved on mulcting and extortion," ni Pimentel.
Alang niya, leksiyon na kini sa tanang pulis nga dili mangutong.
Gihagit usab ni Pimentel ang matag usa nga tabangan ang kapulisan nga mabag-o ug di gyud mohatag og kuwarta.
Giatubang na sab sa mga suspek ang kasong administratibo nga hayan mo-resulta sa pagkataktak nila sa serbisyo.
Nalipay sab kaayo ang mga motorista sa Davao del Sur sa pagkasikop sa mga suspek.
Usa ang drayber og truck nga si Leo Hernandez, kinsa nikanayon nga sa walo ka tuig niyang paghatod og pinya didto sa South Cotabato, di na niya maihap kung kapila ka higayon na siya nga nakuhaan og 'tong' sa mga highway patroler.
"Maayo ra pud gipangdakop nang mga pulisa na kay kusog kaayo mamungot," matud sa drayber.
Nagdumili gihapon sa paghatag og pahayag ang mga nadakpang pulis sanglit ipaagi pa sa imbestigasyon sa Regional Internal Affairs Service (RIAS) ang ilang kaso.
Si Superintendent Albert Lupaz, commander sa Provincial Management Safety Company (PPSC), nitataw nga kuyog sa iyang team, ilang gi-aksiyunan ang taho nga dugay rang ginareklamo sa katawhan.
Gihagit sab sa kapulisan ang katawhan nga mosumbong ugaling nakahimo og sala ang usa ka pulis aron matabangan silang mabag-o ang ilang imahe. (Orlando B. Dinoy)