USA ka lalaki gipriso human gireklamong nanigbas sa iyang silingan didto sa Barangay Upper Licanan, dakbayan sa Panabo, Huwebes sa gbaii.

Nailhan ang dinakpan nga mao si Apolinario Bustamante, 48, molupyo sa Purok 1, Barangay Upper Licanan.

Sa report gikan sa Panabo City Police Station nasayran nga nasikop ug gitugyan ngadto sa buhatan sa kapulisan ni Kagawad Jemmy Amorques sa maong barangay si Bustamante human niya gitigbas ang iyang silingan nga si Felisimo Alimasag pasado alas 6:40 sa gabii didto sa maong lugar.

Ang biktima nakahiagum og samad tinigbasan sa walang bukton ug daling gidala sa hospital.

Ang suspek wa na kahimo sa pag-ikyas ug nasikop sa mga otoridad.

Nagtingkagol na karon sulod sa selda ang suspek samtang gihikay na ang kasong ipahamtang batok kaniya.

Kapulisan sa siyudad sa Panabo mihimo na og dugang imbestigasyon sa nahisgutang hitabo.

Samtang sa laing bahin, duha ka mga last 2, usher nasikop sa kapulisan didto sa Public Market siyudad sa Panabo.

Mga dinakpan nailhan nga mao sila Ruben Saligumba, 30, molupyo sa siyudad sa Tagum ug si Analou Cueson, 23, molupyo sa Barangay Salvacion siyudad sa Panabo.

Sumala sa report nga pasado alas 8:00 sa gabii niadtong Huwebes nasikop sa mga otoridad ang mga suspek sa may palengke subay sab sa ilang hugot nga kampanya labot ilegal nga sugal.

Nakuha gikan sa mga dinakpan ang mga nagkadaiyang mga Last 2 paraphernalia.

Mga dinakpan nagtingkagol na karon sulod sa selda samtang nagpaabot sa tukmang kaso nga ipasaka batok kanila. (Marvin Pineda)