USA ka minero kritikal ang kahimtang karon sulod sa ospital human gipusil sa wa mailhing suspek didto sa Purok Langub, Barangay Pamintaran, lungsod sa Maragusan, Comval Province, Huwebes sa gabii.
Nailhan ang biktima nga mao si Richard Sanchez, 27, molupyo sa Purok Ilang-Ilang, Barangay Poblacion sa susamang lungsod.
Sa report gikan sa Comval Province Police Provincial Office nasayran nga nahitabo ang pagpamusil pasado alas 7:00 sa gabii samtang naglingkod lamang ang biktima gawas sa usa ka tindahan didto sa maong lugar, kalit matud pa nga miabot ang usa ka wa mailhing lalaki.
Sa way paglangan gipusil sa suspek ang biktimang si Sanchez kaduha ka higayon gamit ang wa pa matinong kalibre sa armas.
Naigo ang biktima sa iyang ulo ug tuong bahin sa iyang lawas atol sa pagpamusil hinungdan nga dali siyang gidala sa Maragusan Municipal Hospital aron mapatambalan.
Apan tungod sa grabing samad nga iyang nahiaguman gibalhin ang biktima sa Davao Regional Hospital sa siyudad sa Tagum.
Human sa pagpamusil, ang suspek daling misibat padulong sa wa matino nga lugar.
Kapulisan sa lungsod sa Maragusan mihimo na karon og dugang imbestigasyon sa nahisgutang pagpamusil.
Gilusad na sab ang man-hunt operation aron sa paggukod sa suspetsado. (Marvin Pineda)