USA ka kanhing mayor sa Maguindanao gibanhigan sa armadong grupo alas 11:20 sa buntag, Biyernes, sa probinsiya sa Sultan Kudarat.

Biktima giila sa kapulisan nga si Datu Ibrahim Manot Sinsuat, kanhi municipal mayor sa Datu Blah Sinsuat Maguindanao.

Si Sultan Kudarat Police Provincial Director Teng Tucao Mamalinta nagkanayon nga nahitabo ang pagpamanhig samtang si Sinsuat sakay sa iyang kolor itom nga Toyota Grandia uban ang iyang pamilya gikan sa iyang bay paingon sa usa ka Mosgue sa Barangay Poblacion Buluan aron mosimba.

Samtang naglawig sa dalan, nasugatan nila ang pick-up nga kusog kaayo og padagan.

Wa damha nga sa kalit lang gipaulanan sila og bala sa mga sakay sa maong pick-up gamit ang M-16 Armalite rifles.

Si Sinsuat nga nakabantay sa dautang tuyo sa suspetsado daling milikay sa ilang sakyanan.

Way nasamdan sa iyang pamilya, gawas lamang sa mga igo sa bala sa likod nga bahin sa iyang sakyanan.

Dako ang pagtuo ni Mamalinta nga away sa politika ang motibo sa pagpamanhig.

Gitahasan na ni Sultan Kudarat Governor Teng Mangudadatu ang kapulisan nga susihon pag-ayo ang hitabo aron ma-establisar ang tinuod nga anggulo sa pagpamanhig, mailhan ug madakpan ang mga suspetsado. (Edgardo Fuerzas)