GIPUSIL sa wala pa mailang suspetsado ang usa ka Korean national samtang kini nakig-estorya sa iyang driver sulod sa balay niini niadtong Huwebes mga alas 9:30 sa gabii sa Barangay Cugman ning siyudad sa Cagayan de Oro.
Giila ang biktima nga mao si Kwang We Lee, 50, minyo ug pinay, ug usa ka manager sa usa ka kompanya sa sakyanan sa maong dapit.
Si Inspector Roger Abracete, hepe sa Police Station 10 sa Cugman, niingon nga samtang nag-estorya ang biktima ug iyang driver kalit lang gipalusot sa wala mailang suspek ang buka sa armas sa decorative nga semento ug didto gipusil ang biktima.
Naigo ang ubos nga bahin sa ilong niini nga milahos sa apapangig sa biktima.
Daling misibat ang wala mailang suspek apan adunay nakakita niini hinungdan nga adunay mo-witness ug magtudlo sa suspek nga uwahing naila sa kapolisan apan dili pa ikabutyag ang pangalan.
Dugang ni Abracete nga pila ka semana ang nilabay nagpa-blotter sa Police Station 3 (PS3) sa Agora ang asawa sa koreano human nakadawat ug hulga sa kinabuhi ang iyang bana.
Dako ang pagtuong adunay kalambigitan sa trabaho o personal ang motibo sa krimen.
Ang biktima luwas na sa makuyawng kahimtang ning panahona nga gitambalan sa usa ka pribadong balay tambalanan ning siyudad.