USA ka Korean national ang gipusil sa wala mailhing tawo sulod sa iyang gisakyan nga Toyota Fortuner sa alas 6:35 sa gabii niadtong Biyernes.

Ang insidente nahitabo samtang mihunong sa traffic light sakyanan sa biktima didto sa Kilometro 5, Diversion Road, Barangay Matina Pangi, siyudad sa Davao.

Si SPO2 Carlos Lozarito Jr. sa Investigation and Detection Management Branch (IDMB) sa Davao City Police Office (DCPO) nag-ila sa biktima nga mao si Sam Tae Lee, 53, project manager CJTPI Toyota Company, Darong, Sta. Cruz, Davao del Sur.

Base sa imbestigasyon ni Lozarito uban ni PO3 Dominador Vitor Jr. sa Talomo Police Station, nasayran nga sakay ang biktima sa Toyota Fortuner kauban si Engr. Edwin Derla ug lain pang tulo ka mga Koryano.

Ang sakyanan (plate number NIN-862) nga gimaneho ni Jesusito Mojares gikan sa Ulas paingon sa Maa apan mihunong sila sa Kilometro 5, Barangay Matina Pangi tungod kay "stop" ang signal traffic light.

Si Lee nagbutyag nga dihang "go" na ang signal sa traffic light kalit siyang gipusil sa wala mailhing tawo nga nagsakay og motorsiklo.

Ang biktima naigo sa iyang tuong abaga mao nga dali siyang gidala didto sa Davao Doctors Hospital.

Ang biktima nagsulti sa kapulisan nga human siya naigo sa pagpamusil daling mipadagan ang tawo sa iyang gimaneyo nga motorsiklo ngadto sa wala masayri nga lugar.

Nakuha sa kapulisan ang usa ka baseyo sa bala sa .45 kalibre nga pistola. Gisusi karon sa mga otoridad ang motibo sa maong krimen aron ilhon ang mipusil sa biktima. (Alger Dura)