PULOS deciding games ang masaksihan sa quarter-finals best-of-five series karong hapon sa 35th Philippine Basketball Association (PBA) Fiesta Conference sa Araneta Coliseum.

Sa premirong duwa, magharong ang Rain or Shine Elasto Painters batok Derby Ace Llamados samtang mag-abot sa main game ang Alaska Aces ug Brgy. Ginebra Gin Kings.

Updates on President Benigno Aquino III's presidency

Ang tanang coaches nga nangahilambigit pulos miangkon nga ang nakapabor ning mga duwaa mao ang teams nga adunay taas og kasinatian sa sama niini ka krusyal nga mga duwa.

Kon mao kini ang basihan, nakapabor ang Llamados ug Aces batok sa ilang tagsatagsa ka kontra.

Ang modaog tali sa Elasto Painters ug Llamados mao ang makigharong sa no.2 team ug defending champion San Miguel Beermen sa semi-finals best-of-seven series.

Samtang ang modaog tali sa Aces ug Gin Kings maoy makigsangka sa no.1 team Talk N’ Text Tropang Texters sa laing semi-finals series.

Sa pag-abot sa ilang bag-ong import nga si Tony Washam, ang Llamados ninglampornas sa Elasto Painters, 92-78, sa miaging gabii sa Game 4 aron tablahon ang series. Si Washam nihatag og 29 puntos ug 13 rebounds ning maong duwa.

“It’s a huge blessing that the import we got was a high-level player in Europe,” asoy ni Llamados head coach Ryan Gregorio.

“Sunday’s game is going to be a lot tougher.”

Gawas sa ilang bag-ong import, ang Llamados nagkinahanglan sab gyud og suporta gikan sa ilang lokal nga mga magduduwa hilabi na gikan kang James Yap.

Kay labing seguro, aduna na’y gipreparar nga depensa ang Elasto Painters ngadto kang Washam.