PINAAGI sa usa ka conference call, gianunsyo ni Top Rank promoter Bob Arum nga wala gyud dawata ni Floyd Mayweather Jr. ang tanyag aron mag-away sila ni pound-for-pound champion Manny Pacquiao karong Nobiyembre 13.

Sa oras sa United States, alas 3:00 sa kadlawon ang conference call apan giantusan gyud kini paghuwat sa mga boxing writers.

Si Arum, kinsa naningkamot gyud og maayo aron mahan-ay ang labing giatngang away, tatawng miisa na sa iyang kamot kabahin ning awaya nga mapahigayon karong tuiga.

Updates on President Benigno Aquino III's presidency

Nagkanayon si Arum nga panahon na aron iyang lingion ang alternatibo nilang plano ug kini mao ang pagpakigsabot nila ni Mexican Antonio Margarito o Puerto Rican Miguel Cotto.

Gipasabot ni Arum nga iyang gikanegusasyon mao si Ross Greenburg sa HBO, kinsa maoy naghatod sa mga impormasyon ngadto sa advisor ni Mayweather nga si Al Haymon.

Wala siya nakignegusasyon kang Richard Schaefer sa Golden Boy Promotions apan nagtuo siyang si Haymon na ang mipadangat sa mga kalambuan sa negusasyon ngadto sa Golden Boy Promotion, promoter ni Mayweather.

Hinuon gipasabot ni Arum nga dili pa gyud hingpit nga sarado ang pultahan sa panagharong nila ni Pacquiao ug Mayweather.

Kon dili kini mahitabo karong tuiga, puwede pa kining mapahigayon sa sunod tuig.

“It will be a shame if it doesn’t happen. But I don’t think you guys should be too hard on Floyd,” asoy ni Arum sa www.sweetscience.com.

Batbat ni Arum nga sulod sa 10 ka mga adlaw gikan karon, paninguhaon niyang ma-finalize na ang sunod away ni Pacquiao batok nila ni Cotto o Margarito.

Gipasabot ni Arum nga wala siya’y gipaburan nila ni Cotto ug Margarito ug nagdepende lang gyud ang tanan sa negusasyon.