“IN every law there is an exemption, and that exemption is not the law.” Argumento kini nga ipatugbaw kanunay sa mg batid sa balaod. Duna na diay balaod nga nagdili sa wang-wang o siren. Apan exempted niini ang kapulisan nga magresponde og alarma, ambulansya ug mga opisyal nga naghupot og dagkong katungdanan sa gobyerno ilabina sa Presidente. Gisalindot ni Pres. Noynoy Aquino ang maong balaod ug ipatuman ang kaangayan nga wala na gyoy wang-wang nga magbadhas sa kadalanan sa tuyo nga wala nay makapahimolos nga mga abusado. Mao na lay tugotan ang patrol car ug ambulansya.

Updates on President Benigno Aquino III's presidency

***

Nahinumdom ko kaniadto nga kon duna gani bata motiyabaw hadlukon dayon sa inahan, “hala hilom kay naay abat nagawang-wang”. Hadlok tuod ang bata. Karon lakip nga nahadlok mao ang mga hamtong nga abusado.

MAHINUNGDANON

Apan unsa man gyud ang mahinungdanon alang sa katawhan, ang pag-istrikto sa wang-wang o panginabuhi? Daghan ang mga kabos, busa walay sakyanan nga mosiren. Matag adlaw, maoy nagsiren ang gipangandoy ug panginahanglan. Ang katawhan nahisama sa baybayon nga nagpaabot kanus-a lapdusi sa mga balod. Maoy ilang gipaabot nga human sa piniliay, ang mga lider nga magsugod nag labok nga os-osan ang presyo sa mga palaliton, mapugngan ang pagsaka sa presyo sa lana, pagsulbad sa problema sa panarbaho, paglibkas sa kontraktwalisasyon, suliran sa edukasyon sulbaron, pagwagtang o pagminos ba kaha sa E-VAT kay makalibat, hinabang pinansyal sa mga mag-uuma ug mananagat, tambal sa mga masakiton, balay sa mga walay balay, pagpangga ug pagpanalipod sa atong kalikopan ug labaw sa tanan kapanginabuhian sa mga kabos sa kadaplinan.

BULAHAN

Bulahan ang Compostela kay duha ang gustong mag mayor. Sa iniphanay labaw si Joel Quiño apan miprotesta si Ritchie Wagas kay wala matagbaw sa resulta. Sama ni sa nahitabo sa Tudela ug Daanbantayan nga tagurha say mayor kaniadto. Apan labing bulahan si DILG Director Pedro Noval nga nahimong mayor sa Compostela nga wala makaagi og lansar.

KINSAY MABASOL

Human moambak ang JD Tourist Bus sa titip nga kimba didto sa transcentral highway sa Cansomoroy, Balamban, kining maglilindog mahadlok nga moagi sa maong dapit pauli sa Tuburan. Naghuna-huna ko nga adto agi sa Uling –Naga, apan nadisgrasya pod ang trailer van sa Poog, Toledo ug ang V& JA bus sa Lutopan, Toledo city.

Maayo tingali nga adto ko agi sa via Lugo apan nabulintang sab ang Ceres Bus didto sa Eme, Sogod. Dili diay ang dalan hinungdan sa mga aksidente. Sa imbistigasyon sa LTO, LTFRB ug kapolisan, maoy gihan-okan ang kakilas sa pipila ka mga driver ug ang kondisyon sa sakyanan. Karon na ta manguros nga naigo na sa kilat ang gibana-banang 40 ka mga kinabuhi nga nakalas ug gatosan ang nangaangol. Nalimtan ang pagya nga“ basta driver, sweet lover”.

GISUGDAN ANG PAGPADAYON

Gisugdan ni Gov. Gwen Garcia ang pagpadayon sa mga buluhaton alang sa kauswagan ug kalamboan sa lalawigan sa Sugbo. Iyang gisaad ang serbisyo nga walay pagpihig bisan pa man sa pagtipas ni Vice Gov. Greg Sanchez pagpasilong sa laing landong. Hinuon, gipanghinaot nga ang pag hatag og bulak nga rosas maoy sinugdanan sa pagpahiuli sa nasiak nga relasyong politikanhon. Samtang sa siyudad sa Sugbo, limpyohan ni Mayor Michael Rama ang Citom, mga empleyado, vendors, squatters ug uban pang sagabal sa iyang pamunuan.