ANIA tay nadawat nga reklamo kabahin sa mga binoang gihapon diha sa atong tugpahanan sa Mactan labi pa sa immigration. Ato lang itago ang pangalan sa reklamante gumikan kay maoy iyang hangyo. Basin kuno og mamiligro ang iyang kinabuhi. Aw, okey nakasabot ra man pod ani.

Updates on President Benigno Aquino III's presidency

Dear Mr. Bobby Nalzaro,

Ako nagasunod kanunay sa imong programa sa radyo ug sa newspaper diin ikaw ang makatabang niadtong gilupigan sa ilang katungod.  Mao kini ang nanghitabo:

Niadtong December 2009, may upat ka OFW nga mopaingon na unta sila sa Mauritius para manrabaho didto.  Kompleto kini sila sa papiles (company visa, passport ug e-ticket). 

Sa diha na sila sa airport para immigration clearance, giharang kini sila sa usa ka immigration officer sa walay klarong hinungdan.  Ang iyang pangutana mao lang kon nganong nagdungan silang upat sa paglarga. Walay nahimo ang upat ka OFW kay una pa kini nilang paglarga sa laing nasod aron manimpalad. Busa ilang gikahinabi ang maong immigration officer nga tugtan sila sa paglarga pero sa unsang pagkabutanga, nangayo naman hinuon og immigration fee (kuno) nga tag P15 mil sa kada usa nila.

Ang iya pang sulti nga “December god karon”. Siguro nangayo kini siya’g pinaskohan. Tungod lagi kay gusto sa upat ka OFW nga makalarga, napugos gyud kini sila sa pagpanghulam og kwarta aron ibayad.  Kaluoy sa Diyos, nakalarga gyud intawon sila sa katapusan sa December 2009.  Sa akong kasayoran, kining maong immigration officer usa ka Tagalog speaking nga anaa nagpuyo sa Labangon, gamayon nga pagkatawo. 

Sa sunod unya nakong pagpadala nganha nimo sa maong impormasyon, kuhaon nako ang pangalan sa immigration officer para maklaro. Kining maong paagiha nga kada larga sa OFW pagawas sa nasod, magsige nalang kini siya og pangayo.  Para mahunong kining binuanga’s pagpangutong, palihug mapahibalo kini siya sa kahinginan (on-the-air) aron masanta ang kanunay niyang pagpangwarta. 

Dili ba sa giingon na ni Presidente P-Noy “Kung walang corrupt, walang mahirap”. Daghang salamat kaninyo.  Ako misalig kaninyo nga matabangan ming mga OFW.

TUBAG

Maayo lagi unta og nakuha sa reklamante ang pangalan aron mapasakaan og kaso. Unfair man god pud na sa uban nga nagtinarong. Samtang daghan kurap anang maong buhatan, naa pa may tarong nga nagpabilin. Dili kni unang higayon nga nakadawat kita og reklamo sa mga binoang diha sa Mactan . Daghan na diha nga kolukoy. Gawas sa Immigration, naay taga Pcas ug Customs. Maayo gyod ang ilhon nato.

(bobby@sunstar.com.ph)