MGA SUSPEK sa pagpanglungkab sa Private, Sambag 1 nasikop na sa kapulisan ug ubay-ubay nga mga kinawat ang na-recover.
Apan ang menor-de-edad nga gitumbok nga nangulo sa akyat-bahay wa gyud moangkon nga siya maoy nilungkab sa bay sa magtiayong Erwin ug Charmaine Lirazan.
Nasayran nga ang magtiayon, parehong mga reporter sa Sun.Star Superbalita ug nagpuyo sa dan Cabigon sa maong barangay, maoy uwahing nabiktima sa pagpanglungkab sa maong dapit diin apil sa nakawat ang itom nga HP laptop, digicam ug duha ka mga wristwatch.
Ang 15-anyos nga suspek nga nabantog sa alyas nga Kulit, bag-o lang nakagawas sa bilanggoan.
Nasayran nga wa nay hunong ang gihimong follow-up operation sa hiniusang pwersa sa Investigation and Detective Management Bureau (IDMB), Fuente police station ug Theft and Robbery Section (TRS) apil na ang barangay pinangulohan ni Kapitan Gerry Guardo aron pagsikop sa responsabli sa sunodsunod nga pagpanglungkab sa maong dapit.
Niabag usab sa operasyon sila si SPO4 Raymond Enriquez ug PO3 Julieto Bequilla nga silingan ra sa suspek.
Sila uban ni PO3 Cyril Valencia sa IDMB ang nakasikop sa suspek uban sa lain pang duha ka mga gitumbok nga kuyog niini nga giila usab sa ngalang alyas Tiyanak ug Bo. “Pagkahibawo nako nga si Charmaine ang nabiktima, ako gyud dayon ning gilihok kay naa man koy nailhang mangigoay dihang dapita,” nagkanayon si Enriquez.
Ang suspek niangkong nanglungkab og mga pinuy-anan sa maong dapit apan kusganong nihimakak nga siya maoy nisud sa bay sa magtiayon niadtong Lunes sa hapon.
Tungod sa iyang pag-angkon, ubay-ubay nga mga kinawat ang na-recover gikan sa iyang gibaligyaan.
Apan gisaad sa kapulisan nga di nila undangan ang operasyon hangtod nga di ma-recover ang nakawat gikan sa magtiayon ilabina na ang laptop.
Matod ni Enriquez nga duna na sab siyay gisubay nga suspek nga mamalit og kinawat.
“Kon kinsa may gibaligyaan o nakapalit sa laptop, palihug lang sa pag-uli kon di siya gustong madamay kay mahibaw-an ra gihapon ni kay wa na ni undangi gyud sa mga pulis,” hangyo ni Lirazan niadtong gibaligyaan sa laptop.