BISAN kon gibinisaya na ang pasulit sa Land Transportation Office (LTO-7) alang sa mga bus drayber, mayoriya gihapon kanila ang nangahagbong.

Tungod niini, si LTO-7 director Raul Aguilos niingon nga ipaubos nalang ang mga drayber sa skills proficiency exam kun actual driving test.

Niadtong Biyernes, laing batch sa mga bus drayber ang gipa-seminar ug gipakuha og written exam nga gihimo na sa pinulungang Bisaya.

Updates on President Benigno Aquino III's presidency

Apan sa 52 nga ni-exam, unom ra ang nipasar.

Una na niining nikuha ang 62 usab ka mga bus drayber nga nag-seminar niadtong Miyerkules apan usa ray nipasar.

Sagad sa maong mga drayber dugay nang nagmaneho maong gikahibung nganong di sila mopasar sa exam.

Hinuon, matod ni Aguilos, nga matino gyud ang kahibawo sa mga drayber sa himuong actual driving test.

Kon mahagbong pa niini ang drayber makonsiderar na gyud kini nga di angayang magmaneho.

Nasayran nga gihimo karon sa LTO ang re-training / seminar sa mga bus drayber gumikan sa sunodsunod nga vehicular accident nga niresulta sa pagkakalas sa daghang mga kinabuhi.

Gibanabanang moabot sa 1,200 ang tanang bus drayber sa Sugbo maong ang seminar nga gihimo sa Cebu International Convention Center (CICC) gihimo lang by batch aron di usab maapektohan ang pagdagan sa mga bus.

Ipahigayon ang seminar sa adlaw’ng Lunes, Miyerkules ug Biyernes ug si Cebu Gov. Gwen Garcia ang nigasto alang sa ilang pagkaon. (CPL)