MANANAGAT nga gibugalbugalan sa iyang silingan nga batig tingog sa iyang pagkanta og “Samtang ako may kinabuhi” sulod sa videokihan sa Brgy. Mangoto, lungsod sa Pinamungajan, Sugbo nanunggab.
Ang biktima nga nataroyan sa kutsilyo sa iyang buko-buko giilang mao si Elmer Liugan Fajardo, 45 , minyo, trisikad driver ingon man manghakutay og tubig sa ilang lugar. Siya naa karon sa Vicente Sotto Memorial Medical Center (VSMMC).
Ang suspek giila sa kapulisan nga si Florentino, 60, kinsa nisibat human sa krimin.
Apan ang iyang duha ka mga anak nga sila si Felix, 37, ug Alfredo 33, pulos usab mananagat nadakpan sa hot pursuit operation sa kapulisan.
Sa imbestigasyon nila ni PO3 Rey Toquerosa Pinamungajan police, ang amahan ug mga anak niabot sa usa ka videokihan sa ilang silingan nga imnanan.
Ang mga suspek nakainom nang daan.
Gikaabot nila ang grupo sa ilang mga silingan, lakip na ang biktima.
Si Florentino nihupot na sa microphone ug nikanta na sa iyahang kinaham nga awit “Samtang ako may kinabuhi,” apan gikantiyawan siya ni Fajardo.
Gumikan sa pagbugal-bugal, nasuko og maayo ang suspek nga nisangko sa ilang panaglalis ug pagsinukmagay.
Nahitabo gyud ang karambola sa sulod sa videokihan tali sa duha ka mga grupo.
Giingong gisuntok ni Florentino ang biktima ug dihang nahagba na, gikuptan sa duha ka mga anak nga sila si Felix ug Alfredo.
Samtang gikuptan, gidunggab ni Florentino si Fajardo sa buko-buko.
Nadakpan hinuon sa gipahigayong hot-pursuit operation sa kapulisan ang duha ka mga anak sa suspek, samtang ang amahan nakasibat.
Si PO1 Royland Velasquez sa Pinamungajan Police Station nga nahinabi sa Sun.Star Superbalita niingon nga daan na gyud nga dunay problima ang suspek kay dali kaayong masuko kon kumedyahan.
Matod pa ni Velasquez nga nakuha gyud nila ang kutsilyo sa suspek human gialarma.
Gani niadtong miaging tuig ang anak niini nga nga si Alfredo, kinsa natanggong karon sa ilang prisuhan, gikataho nga patyon unta sa amahan dihang sila nagkaaway usab sa usa ka imnanan.
Si Alfredo nga nahinabi sa Sun.Star Superbalita hugtanong nihimakak sa pasangil nga ilang gitabangan sa paghupot ang biktima dihang gidunggab sa iyang amahan.
Matod niya nga ang biktima nga iyang amigo permanenti na kining mobugalbugal sa iyahang amahan sa panahon nga magkainom sila sa videokihan.
Apan ang iyang amahan napuno na sa pagbugalbugal.
“Kuan man gud na si Papa dali kaayong mapikon kon kumidyahan. Nikanta na siya sa paborito niining kanta nga “Samtang ako may kinabuhi” pero gibugalbugalan ni Fajardo nga nagkanayon “Baya no?...Bawlang,” hinungdan nga naglagot ang iyang amahan.
Gipasabot ni Alfredo nga ang pag-ingon og “Baya no? ug bawlang” maoy nauso sa ilang lugar nga maoy ilang naandam sa pagsaway niadtong mga tawo nga batig tingog.
Iyahang nakit-an nga nakadugo na ang biktima ug gidali sa pagdala sa tambalanan, apan ang pasangil nga ilang gitabangan sa pagkupot di tinuod.
Hinuon gi-angkon niini nga nasumbagan gyud sa iyang amahan ang biktima apan wala na gyud siya makakita kon gidunggab ba kini sanglit nagkaguliyang na ang lugar diin sila pulos nag-inom. (Guam P. Logroño)