DAKO na ang kabag-ohan nga atong namatikdan sa dakbayan. Sa pagsugod sa bag-ong termino ni Mayor Dongkoy Emano, adunay ubay-ubay nga mga kabag-ogan nga nakita sama sa pagrevamp sa mga Department Heads sa City Hall. Usa kini ka importante nga lakang tungod ka yang mga tawo nga molihok mao may iyang gisaligan nga moabag kaniya samtang ang kadtong uban gibutang kung aha pud sila angayan. Dili kini insulto sa pagdumala ni Kanhi Mayor Constantino Jaraula sa mga tawo nga iyang gibutang tungod kay mga maayo man usab kadto sila sa ilang tagsa-tagsa ka puwesto apan lain-lain man ang pagsalig sa tawo ug ang uban napromote usab sila.

Padayon paman kini nga revamp busa abangan pa kini siya kinsa na pud ang mabalhin. Maayo kini nga lakang tungod kay makita nato ang lain-lain na usab nga pagdumala, kasagaran mga aktibo man kini sila. Busa malauman nato nga aduna gyud kita'y dugang nga kalambuan ilabina sa serbisyo publiko. Ato usab nga lauman nga mobutang si Mayor Emano sa tawong maka-usab sa dagan sa trapiko sa atong dakbayan kay sa una pa kini nato nga problema ug ang dakbayan paspas ang kalambuan ug dili pwede nga ang trapiko maiwit tungod kay dako kini nga matang sa kalambuan sa usa ka dakbayan.

Nalipay usab kita sa gipakita nga ehemplo sa atong Mayor nga siya mismo ang gaunay nga moatubang sa mga tawo nga adunay tuyo kaniya. Dako kini nga kabag-ohan gyud, busa sa mga kritiko niya makaduda gayud sila kung unsa kini nga lakang kay sa kadugayan niya sa politika wala kini nila nakita siya nga mag-ingon naana. Wala'y lain akong ikasulti kungdili gauna siya pirmi sa iyang mga kontra ug taman nalang sila sa pagsaway kaniya, wala gayud sila'y mabuhat tungod kay milihok naman siya isip mayor nga adunay pagpakabana sa katawhan. Lauman nato ang insaktong kabag-ohan sa dakbayan ug padayon kita nga mosuporta tungod kay para man kanato ang maong dakbayan dili man para sa uban.

Sa laing bahin, misugod na usab og sulong ang bagyo pinaagi ni Basyang. Ubay-ubay sad ang namatay ug nawala. Dili naman kini bag-o nga balita kanato tungod kay agianan man gyud kita, ang ato lamang nga dili gayud mohawa ang mga tawo nga daplin sa suba busa sila gyud ang unang biktima sa mga baha-baha. Aduna gayu'y mamatay kung pirmi ingon niini ang mga tawo, bisan unsa pa ang alerto ug pahibalo sa ila dili gyud mohawa. Padayon ang kausaban sa panahon ilabina sa atong kinaiyahan busa amping gayud kita ug magbantay dili magpasagad ka yang kinaiyahan raba dili moila ug tawo. Maayong adlaw ug Daghang Salamat!