ANG paghitak sa sakit nga dengue sa Davao del Sur, Central Mindanao ug sa ubang dapit dinhi sa Mindanao maoy unod sa mga taho dinhi sa Superbalita niadtong miaging semana.

Apan labaw nga akong nakita ang problema dihang ang akong 9 anyos nga babayeng apo gihilantan. Among gipahiling ang iyang CBC, platelet niadtong Martes, Hulyo 13, ug nasuta nga miubos kini ngadto sa 185 samtang ang normal range kun wa pa ko mahikalimot gikan sa 350-150.

Ang pedia doctor sa among bata nagtambag nga ipausab ang pagpakuha og CBC platelet ug tuod dihang nakuha ang resulta, among nakita nga miubos pa gyud ang 185 ngadto sa 149.

Tungod niini, ang doktor mihatag og rekomendasyon nga "for hospital admission" na ang bata. Kini nahitabo niadtong Sabado, Hulyo 17, 2010.

Human sa hamubong pakigsulti sa akong anak nga maoy inahan sa bata, nakahukom kami nga isud dayon sa ospital ang bata aron ma-monitor ang iyang platelet ug madapatan og tambal.

Ang bata covered sa health care sa iyang mama mao nga wa kaayo kami naghunahuna sa balayranan unya apan ang among suliran mao ang kakuwang sa hospital room!

Sa alas 9 sa buntag, miadto kami sa Davao Medical School Foundation Hospital apan gisultihan kami nga way bakante -- sweet room, private ug ward! Gisuwayan namo ang ubang ospital apan nasuta nga wa ang Davao Doctors Hospital, San Pedro Hospital, ug Brokenshire Hospital, mga ospital nga accredited sa health care, pulos sab nagsugwak og mga pasyente, kadaghanan mga bata nga gihilantan ug

gi-dengue!

Nihangyo kami sa mga personahe sa ospital nga mahatagan og reservation nga private room sa higayon nga mabakante nianang adlawa, Sabado. Wa na kami mihawa sa lobby sa ospital kay naghuwat nga dunay room nga mabakante.

Samtang naghuwat, nagpunay usab og abot ang mga ginikanan dala ang ilang mga anak nga gi-dengue ug naghangyo og 'admission' apan sama kanamo gibalibaran kay way 'available room.'

Sa alas 3 sa hapon dunay nabakante nga ward ug amo dayong gi-okopahan. Apan sa maayo pa gyud nga palad, alas 5 sa hapon nabalhin kami sa private room. Nakaginhawa kami og lu-ag!

Mga ospital nga atong gihisgutan nagsugwak sa mga pasyente tungod sa pagdagsang sa sakit nga dengue nga kadaghanang biktima mga bata.

Sa among bahin, hinlo man ang palibot sa among bay apan di ko makasiguro sa gawas, ilabi na sa tunghaan.

Karong panahona lisud gyud masakit tungod sa kakuwang sa hospital room. Samtang ako gihimo kini nga column misantop usab sa atong hunahuna kun unsa kaha ang nahitabo ug kahimtang sa mga bata sa bukid nga gitaptan sa sakit nga dengue. Unta molihok og maayo ang Department of Healtlh ug mga health centers sa pagtabang sa mga bata.

Dili lalim magkasakit karong panahona.