MIHINAY na ang operasyon sa ilegal nga sugal sa Rehiyon 12 tungod sa padayong pagpanakop sa mga suspek.
Matud ni Region 12 Police Director Felicisimo Khu, nga mikabat sa 192 ka mga anti-illegal gambling operations ang ilang gilusad gikan sa Abril hangtud Hunyo ngadto sa nagkadaiyang mga siyudad ug munisipyo sa rehiyon 12.
Ang Region 12 gilangkuban sa mga probinsiya sa South Cotabato, Sultan Kudarat, Saranggani, North Cotabato ug mga dakbayan sa General Santos, Koronadal, Tacurong, Kidapawan ug Cotabato.
Niadtong Abril, subling gimando ni Khu ang hugot nga kampanya batok illegal gambling ug illegal drug activities nga sumala pa naghitak sa mga nahisgutang dapit.
Matag police station gimanduan sab nga makabaton og mokabat sa upat ka mga kalampusan sa ilang kampanya batok sugal, duha sab sa anti-illegal drug operations matag bulan.
Gibaharan sab ni Khu ang mga pulis nga nalambigit sa pagprotekta sa mga tawo nga nagpaluyo sa sugal, nga kun masignit sila, matangtang gyud sila sa serbisyo.
Tungod niini, gihangyo sab ni Khu ang mga militanteng grupo nga himuon manglihok dayon ug ipakita sa katawhan ang ilang aksiyon batok illegal gambling ug druga. (Edgardo Fuerzas)