MIKABAT sa P35-mil nga kantidad sa mga kabtangan ug kwarta ang natangag sa wa mailhing mga tawo human nila giransak ang usa ka lending company didto sa dalang Gante Dalisay Barangay Magugpo West, siyudad sa Tagum, Sabado sa buntag.

Sa report gikan sa Tagum City Police Station nasayran nga midangop sa buhatan sa kapulisan ang manager sa Asset and Credit Loan Inc. nga si Rommel Hampac human giransak sa wa mialhing mga suspek ang ilang buhatan.

Matud ni Hampac nga usa sa iyang mga empleyado nga si Rey Paeldan ang nakadiskubri pasado alas 7:45 sa buntag nga naguba na ang kisame sa maong buhatan ug gituohang giagian sa mga suspek sa ilang pagsulod

Nahanaw sulod sa maong buhatan ang kwarta, tulo ka yunit nga cellphone, usa ka seiko watch, lakip ang usa ka kalibre .9mm nga pistola sulod sa maong buhatan nga mikantidad tanan og kapin P35-mil.

Gituohan nga Biyernes sa gabii gihimo sa mga suspek an pagransak samtang serado pa kini.

Wa pa masayud ang manager sa nahisgutang buhatan kinsa ang mga suspek.

Kapulisan sa siyudad sa Tagum mihimo na karon og dugang imbistigasyon sa hitabo. (Marvin Pineda)