USA ka laborer kritikal ang kahimtang karon sulod sa ospital human gitigbas sa usa ka mananagat didto sa Purok 9, Sityo Tagbi, Barangay Canaan, Kaputian District, Island Garden City of Samal, Biyernes sa gabii.
Ang biktima nailhan nga mao si Nicolas Fernan, 35, molupyo sa Purok 4, Barangay Canaan, samtang ang suspek mao si Cristituto San Juan 28, ug molupyo sa susamang dapit.
Sa report gikan sa Davao del Norte Police Provincial Office kagahapon, nasayran nga nahitabo ang pagpanigbas pasado alas 7:00 sa gabii samtang nagtindog lamang ang biktima sa basketball court didto sa maong dapit, kalit nga miabot ang suspek ug gitigbas kini gamit ang sundang.
Wa gayod kabantay ang biktima sa pagpanigbas mao nga naigo siya sa iyang ulo. Ang biktima nga si Fernan daling gidala sa Southern Philippines Medical Center (SPMC) sa siyudad sa Davao aron mapatambalan.
Ang suspek nasikop sab sa mga miresponding pulis sa Kaputian Police Sub-station.
Kapulisan mihimo na karon og dugang imbistigasyon sa hitabo, samtang giandam na ang kaso batok sa suspek. (Marvin Pineda)