Hepe sa TMG gipalagpot

GIPUTBOL na isip hepe sa Provincial Traffic Management Center PTMG) si Senior Inspector Raul Marante human nasakpan ang tulo niya ka mga sakop nga giingong nangilkil didto sa national highway sa lungsod sa Hagonoy, Davao del Sur.

Dungan niini gidayeg sab ni Davao del Sur Governor Douglas Cagas ang gihimong aksiyon sa kapulisan sa rehiyon nga pagdakop sa mga "Kotong Cops" nga nagbiktima sa mga motorista sa lalawigan.

Apil sab nga nihatag og pagdayeg sa mga pulis sila si first district Representative Marc Douglas Cagas ug Hagonoy Mayor Franco Calida sanglit alang nila dugay ra silang nakadungog sa mao nga reklamo.

Ang pagtaktak kang Marante nahitabo human gihulagway nga wa niini ma-disiplina ang iyang mga ginsakpang sa TMG aron di mangotong, matod ni Senior Superintendent Gregorio Pimentel, ang Regional Traffic Management director.

Niadtong Huwebes, tulo sa mga sakop ni Marante, nga sila si Senior Police Officer 3 Carlito Albite, SPO2 Alfredo Timosan, PO2 John Lester Llevado, giingong nasakpan sa surveillance camera ug entrapment operation samtang gipasanginlang nangilkil og salapi giakan sa usa ka nagsakay og motorsiklo.

Ang pagsikop gipasiugdahan sa Southern Mindanao Police Office.

Narekober sa kapulisan ang marked money nga gigamit sa entrapment operation, ingon man ang gituohang mga koleksyong salapi sa tulo ka mga pulis-trapiko nga ang uban gipangkumot pa sa dihang nakit-an sud sa sakyanan nga usa ka Toyota Revo.

Laing sibilyan ang gikustodiya sab sa kapulisan human gihimo kining bata-bata, nga maoy tigpunit sa mga gilabay nga kwarta sa mga motorista.

Si Colonel Alberto Lupaz, commander sa Provincial Management Safety Company (PPSC), nagkanayon nga gawas sa pagtaktak kang Marante, gi-imbestigahan sab siya sa Regional Internal Affairs Service.

"It is his command responsibility to manage his men but he failed to do so," ni Lupaz kinsa kuyog sa maong operasyon ug nidugang nga angayang i-supervise unta sa opsiyl ang iyang mga sakop aron di mahitabo ang pagpangilkil.

Hinuon, wa diha si Marante niadtong tungura.

Si Pimentel, nikanayon nga nahasubo siya sa hitabo kay kanunay niyang gipahinumduman ang iyang mga sakop aron di mangilkil.

Human giduso ang kasong direct bribery attempt ug paglapas sa anti-graft and corrupt practices act batok nila Albite, Timosan ug Llevado didto sa provincial prosecutors office, si Timosan giingong nakagawas na human nakabayad og piyansa nga P40 mil apan nagpabilin pa sa presento ang mga kauban niini sa pagsuwat ning balita kagahapong adlawa.

Nasayran sa Sun.Star SuperBalita nga laing kasong administratibo sab ang ipahamtang batok sa mga dinakpang pulis nga kun mapamatud-ang sad-an sila, tangtangon dayon sa serbisyo.

Si Mayor Franco Calida nalipay sa hitabo sanglit naundang ra gyud ang pagpunay og pagpangilkil sa mga pulis-trapiko.

"Dapat sila tiguwang na man sila, wa na unta sila ni-entra anang mga butanga," pung sa batan-ong Marc Cagas, kongresista sa Unang Distrito sa probinsya.

"Nalipay kaayo ko ana. Nalipay ko tungod kay dugay ra kaayo na silang gi-reklamo ilabi pa sa mga pobreng drayber," dason ni Governor Cagas, kinsa hugot sab nga nikampanya aron maundang na ang pagpangolekta og 'ekis' sa ubang sakop sa kapulisan aron ma-proteksyonan ang mga sugalan sa Davao del Sur.

Sayo niini, gihagit ni Cagas ang kapulisan nga tinud-on ang pagpaundang sa duwang Last 2 (resulta gikuha gikan sa Lotto Draw matag gabii) nga naghitak dinhi sa lalawigan.

Dako ang katingala sa gobernador nganong di madakpan ang mga nagpaluyo sa sugal kinsa nagbutang na gyud og pwesto diin manaya ang katawhan. (SuperBalita)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph