BISAN hugot ang kampanya sa kapulisan batok sa Buak Kotse Gang, apan wa sila mahadlok nga masikop dihang ilang giatake ang usa ka sakyanan nga giparada atubangan sa UM Multi-test sa dalang Ponciano, siyudad sa Davao.

Mga kawatan malampusong mibuak sa salamin sa sakyanan ni Engr. Antonio Yasay, 49, minyo, government employee ug nagpuyo sa Koronadal, South Cotabato.

Si Yasay nagpatala sa San Pedro Police Station nga nabiktima siya sa mga sakop sa Buak Kotse Gang sa ala 1:00 sa hapon niadtong Sabado.

Matud ni Yasay nga iyang giparada ang Nissan Terrano nga dunay plate number YDU-507 sa dalang Ponciano apan sa iyang pagbalik nabuak na ang salamin sa maong sakyanan.

Mga kawatan, suma ni Yasay, malampusong mitangag sa iyang bag nga dunay mga mahalong butang sama sa pantalon, lima ka USB ug sing-sing bulawan.

Way nahimo ang biktima niadtong higayona gawas sa pagpatala ngadto sa presinto sa kapulisan aron gukdon ang mga kawatan.

Ang kapulisan nagbutyag nga tungod kay daghang gwardiya ang mga mall sa siyudad mao nga ang giatake sa mga kawatan mao kadtong mga sakyanan nga giparada daplin sa kalsada.

Ning semanaha, namingaw ang operasyon sa mga sakop sa Buak Kotse Gang human nagmando si kanhi Mayor Rodrigo Duterte ngadto sa mga tagdumala sa mall nga ilang higpitan ang pagbantay sa mga sakyanan nga moparada sa ilang establisemento. (AD)