MAKUTAS nga dalan maoy giagian ni AJ “Bazooka” Banal una pa niya malangkat ang World Boxing Organization (WBO) Asia Pacific Bantamweight championship atubangan sa gibanabanang 30,000 ka mga tawo nga mihan-ok sa “Sandugo-Labanan ng mga Kampeon” sa Carlos P. Garcia Sports Complex sa Tagbilaran City.

Nabuntog man tuod ni Banal sa ikalima nga round ang batan-on nga agresibo, lantip og may kusog usab nga si Big Yoo sa South Korea, apan niagi una siya og ka rogi sa makaduha ka higayon.

Updates on President Benigno Aquino III's presidency

“Kusog unya abtik kaayo. Ako nang gibuhian ang tanan nakong kusog, pero kaunon ra man ang akong kumo,” matod ni Banal sa dihang gikahinabi sa mga tigbalita human sa away.

“Narogi ko sa 3rd ug 4th round pero naninguha lang gyud ko nga makabawi.

Sa ikalima nga round, naunhan si Banal pag-ataki ni Yoo ug nagkapuliki kini og panagang sa mga makusog nga mga kombinasyon sa Koreano kinsa agresibo na kaayo sa maong round.

Daw sa nahilom ang mabagang dumadapig ni Banal nga nagtan-aw sa ilang idolo nga naninguhang makaipsot sa mga kinumo ni Yoo, apan sa dihang miyuko si Banal aron paglihay sa mga nagtuasik nga right straight sa Koreano, sa kalit lang, nakapatighog kini og usa ka right cross ug gisundan sa makusog nga left upper cut nga sa wa damha, nakapakamang ni Yoo.

Gusto pa gyud unta nga mobangon ang Koreano apan daw sa di na gayud kini niya mahimo pa ug nagpanglingolingo kini nga mitan-aw sa iyang trainer ug manager diha sa ilang corner.

“Pagka-down niya, akong gihuwat kay abi nako og mobarog pa, pero nagpirat-pirat na man ang mata, naglisod pagtindog, mao to miambak-ambak ko,” dugang ni Banal kinsa nagisian sa ikaduhang round tungod sa accidental headbutt.

Sa kadaugan siya aduna na karo’y 22-1-1, 18 KOs nga record samtang si Yoo, 16-3, 11KOs.

Isip pagpasalamat sa suporta, si Banal nakigsawo sa selebrasyon ngadto sa iyang mga fans nga mi­warawara sa iyang mga kamot ug nagpasalamaton sa tanang mitambong ug

misuporta kaniya.

“We know that he’s never been knocked out before this fight. Somebody told us that the guy (Yoo) is a tough fighter, and we can’t underestimate him. So our plan is if Banal can’t knock him out in the early rounds, we will for a decision win,” matod ni Antonio L. Aldeguer, ang amahan sa Ala Boxing gym.

Ang presidente sa Ala Boxing Promotions nga si Michael Aldeguer, mibutyag nga si Banal gikatakdang moaway karong Oktubre 29 sa Dubai batok ni kanhi world champion Luis Peres.

Ang laing Ala Boy nga si Jason Pagara nasugamak usab og susamang sitwasyon ni Banal sa iyang pagpakigsangka sa laing Koreano nga si Kim Young Bin.

Daw mikidlom ang paglaom ni Pagara sa unang round human kini kastigoha ni Kim kinsa dako og mas taas pa kaniya. Sayo kaayong namuwa ang nawong ni Pagara nga nahilam-os sa mga walop sa Koreano.

Apan sa second round, nakahimo og adjustment si Pagara ug iyang girapido sa iyang mga kumo si Kim kinsa nagisian sa iyang duha ka ibabaw sa kilay. Tungod sa grabing gisi ug pag-agas sa dugo, gipaundang si Kim sa referee.

Midaog usab si James Bacon batok ni Eric Macas sa katapusang 2:05 sa ikaunom nga hugna, ug gi-knockout usab ni Ricky Sismundo si Jovi Merca kinsa katulo matumba sa ikaduhang round.

Laing miuli nga nagmadaugon mao sila si Rocky Bacor, Jomar Cordinillo ug Wilbeth Loberanis.

Ang maong boxing promotion giayudahan sa ALA Promotions, ABS-CBN Sports, Sandugo Foundation, Inc. ug ingon man sa Tagbilaran City ubos sa pagpangulo ni Mayor Dan Lim.