PANGI. Mao ni ang sikat kaayo nga sag-ubanan og tubig diha sa Sitio Dakit , Barangay Poblacion sa lungsod sa Pinamungajan.
Sa gagmay pa mi sa akong manghod nga si Neneng kini nga dapit nahimo na nga kabahin sa among inadlaw nga kalihukan. Ang tubig nga imnon ug ipanghugas mag gikan sa usa ka dakong tinubdan sa tubig ilawom sa usa ka dakong puno-an sa kahoy sa Pangi.
Tungod sa ka kusog sa sa buga sa tubig, way maglinya bisan sa ka daghan sa mga tawo nga manglaba, maligo ug magsag-ub para imnon. Hapit tanang molopyo sa maong sitio, gawas lang niadtong tubodtuboran nga nakapaugbok og puso, sa pangi nagkuha sa ilang mainom nga tubig.
Sa gidugayon sa akong pag-estar sa maong dapit hangtod nga nibalhin ko og eskwela sa Zamboanga, wa gyud ko mahinumdom nga dunay nagreklamo nga nagkalibang o gisakitan og tiyan tungod sa tubig nga ilang giinom. Mao nga mahibung kaayo ko nga makadungog og balita nga dunay mga tawo nga milandig sa tambalanan kay nakainom og tubig nga kontaminado.Sa ato pa, di na gyud luwas imnon kanang mga tinubdan nga kulang sa pag-amoma sa gobyerno. Kong giamoma man tingale di sab seryuso.
REFILLING
Gumikan kay di na ta kasiguro sa kaluwas sa tubig mainom, daw uhong nga nanurok kining mga refilling stations nga maoy gidatu-an og maayo sa mga operator.
Halos tanan ug wa ko masayop bisan kadtong naa sa squatters area, sa refilling station na magkawos og tubig kay mahadlok nga magkasakit. Nindot sab kaayo ang propaganda sa mga refilling station kay kuno miagi og daghan kaayong stages ang pag-process sa ilang gibaligya nga tubig.
Sa akong nahibaw-an sa usa ka litro nga tubig nga i-process aron mahimong purified water, 30 porsento lang ang mogawas nga para baligya samtang ang 70 porsento adto padung sa kanal. Ang pait kay ang uban gihimong 50-50. Sa ako pa gyud nga nahibaw-an nga kong kompleto ang stages dako ang imong investment, apan ang gihimo sa uban gi-short cut ang stages aw... gamay ra sab ang pohunan, dako kaayo ang ganansya.
Ang uban wa naman gani maggamit og ultra violet light aron mapatay ang bacteria. Duna tuod ultra violet light apan igo ra nga gi-display para dismolar ba, wa magamit kay way suga.. Tungod sa short cut taas kaayo ang TDS kun Total Dissolve Solids sa gipamaligya nga purified water.
Mao ni angayan nga susihon sa gobyerno kung tinuod ba kanang ilang gipropaganda. Ang pangutana ani akong ang atong gobyerno duna ba’y kahimanan pagsusi sa katinuoran ning ilang gipagarpar.
TAKSIKOO
Nakompleto na ang website nga atong gitagana alang sa atong giplano nga pagatukoron nga kooperatiba alang sa mga taxi driver. Ang website nga gidesenyo ni Sir Tet mao: www.taksikoo.rpweb,ph. Mahimo na ni nga ablihan bisan unsang orasa.
Kuwang pa hinuon sa mga inpormasyon labot sa kooperatiba nga tukoron, nindot nga kaugmaran nga ang mga taxi driver dinhi sa ato duna na’y kaugalingong website.
r