MATUDni Mark Twain, ang tawo maoy bugtong hayop nga kamaong manglipaghong.

Moduko ta basta naay salawayon nga atong nahimo. Apan dili kamaong mauwaw ang board sa MCIAA kon Mactan Cebu International Airport Authority. Kini nahimong tataw nunot sa ilang paghatag sa gitawag nga “severance pay”nga mikabat ug tunga sa milyon ka pesos ngadto kang Patria Aurora Roa, kanhi Department of Tourism (DOT) director ug kanhi miyembro MCIAA board.   

Nga wa nila batia ang kahilas ug kaluod sa ilang gihimo o makita ang kangil-ad sa ilang resolusyon maoy timaan sa pagkahagba sa kalidad sa pampumblikong pangalagad.

Updates on President Benigno Aquino III's presidency

Ug atong lauman nga padayon silang maghiusa pagdepensa sa ilang kakuwang sa kaikog.

Kay mao man kana ang marka sa mga tawong way uwaw: mopasigarbo sa ilang salawayong buhat ug moinsistir paghimo niini. Tingali naghuwat sa ilang turno nga sila na usab ang makadawat.    

Ambot kung naliwat ba sila ni Arroyo si Arroyo ang naliwat nila. Kamo na lay pili.  

Labaw pa nga way hinungdan ang pagtandi sa pribado nga korposrasyon sa mga korporasyon nga gipanag-iya sa gobyerno. Ang katawhang Pilipinhon ang nanag-iya sa nauwahi.

Sa pribado nga korporasyon, makapatuyang ang mga stockholders kung bout sila mosawom  sa mga benepisyo depende sa dagan sa ilang negosyo.     

Apan nalipay ko gamay nga ang board nipakita sa ilang tinood nga bulok tungod kay dali ra unya nato sila matandi sa nasyonal nga liderato ning atong nasud.

Si Noynoy Aquino naningkamot nga magpuyo sa yanong kinabuhi samtang nangalagad,  naningkamot nga dili makahimo ug mga butang nga makapaiknat sa kilay sa yanong lungsoranon hilabi na may labut sa sakto nga paggamit sa salapi sa katawhan. 

Tingali kung kini nga balita nibuto sa panahon ni Arroyo, mahug nga dili na kini balita tungod kay si Arroyo mismo dako man nga buaya. Hinaot nga naay makahonghong sa mga miyembro sa board nga bag-o na ang administrasyon sa nasud. Kay tingalig naghagok pa silang tanan.   

Wa sab magpauwahi si Gov. Gwen Garcia. Iyang gipahimug-atan nga ligal ang gihimo sa board. Largahan ta sa way pagtugot nga ligal, apan moral ba kini? Nihanap na gyud pag-ayo tingali ang panan-aw sa gobernador may labut sa unsay sakto ug unsay sayop.

Aw, hinoon, unsay imong ikasulti sa tawo nga wa nakakita sa sayop diha sa pagpalit ug yuta ilawom sa dagat ginamit ang minilyon nga salapi sa katawhan. Pasagdi na lang nang iya mga tigpaghot. Kay unsa man gud ang buhaton sa iro, dili ba mopaghot?

 

Hinaot makat-on sila (ang pipila nga anaa sa gobyerno) paggamit sa balaod isip hinagiban sa hustisya ug dili kaldero sa ilang kahakog.    

(birada_ruphil@yahoo.com)