KON mosuroy ka sa kadalanan sa dakbayan sa Sugbo panahon sa kagabhion, mosugat sa imong panan-aw ang pipila ka mga tawo nga nanaghigda sa aseras ug mga sky-walk, nag-agwanta sa kabugnaw sa semento ug usahay, sa salibo sa uwan.
Mokitbi ang imong atay ug morag kumuton ang imong kasingkasing kon imong makita ang mga gaymayng bata nga nag-unlan lang intawon sa bukton sa ilang inahan.
Di sayon ang pag-abog kanila kay mobalhin man lang og laing aseras kay wa man lagi silay laing kapaingnan.
***
Usa sa mga programa ni Cebu City Mayor Mike Rama mao ang paglimpyo sa kadalanan sa dakbayan – hawanan sa mga basura ingon man sa mga tawo nga nanagpuyo sa mga aseras, lakip na sa rugby boys.
Maayo kining maong plano ug angay ug matarong gayud nga ipatuman kini.
Busa gisusi na karon sa Department of Social Welfare and Services sa kagamhanan sa dakbayan ang mga hinungdan nganong anaa na sila nanagpuyo sa aseras.
Kadtong gusting mopauli sa probinsya tabangan ug papaulion. Apan asa man kaha ibutang
kadtong way kapaingnan?
***
Laing programa ni Mayor Mike Rama mao ang paghawan niadtong nanagpuyo sa daplin sa mga sapa sa dakbayan nga kuyaw kaayong ianod sa baha labi na karong ting-uwan na.
Usa sa iyang laraw mao nga papaulion sila sa ilang probinsya.
Ang iyang nakalimtan nga kining mga tawhana dugay nang nagpuyo sa syudad, nakakita nag kaugalingong panginabuhi dinhi, duna nay mga pamilya ug naanad na sa kinabuhi sa syudad bisan sa ilang kakabus.
Bisan si kanhi mayor Tomas Osmeña naglisod sa pagpapahawa nila. Apan tingali madani sila kon gikan sa ilang gipuy-an nga nag-ungaw sa kakuyaw, ibalhin sila sa mas luwas
ug hapsay nga relocation site.
***
Kon daghan ang mga problema sa nasod nga angay sulbaron ni Presidente Noynoy “PNoy” Aquino, dunay mas nakahasol karon kaniya.
Mao kini ang nagpusot-pusot nga text nga iyang madawat, gikan sa 40 ngadto sa 55 ka text messages matag adlaw nga iyang tagsa-tagsaon sa pagtubag.
Ang nakaparat kay hasta ang atong presidente wang kaipsot gikan sa mga text scam, lakip na niadtong mangayog load, car ug housing loan.
Usa niini nag-ingon, “Can you spare some load, Mr. President?”
Panahon na tingali nga mag-hire na lang siya og presidential assistant nga tigtubag sa iyang text messages o kaha iyang ipasulbad ni Jerry Yntig, ang haring gangis sa Globe Telecom.