Kon ikaw pahukmon: Papa si Lolo

USA niana ka buntag niadtong 1994, nilakaw si Neneng kay gihangyo sa ilang silingan nga limpyuhan ang ilang umahan. Niadtong higayuna usab, si Lucia, ang 9-anyos nga anak nila ni Isyot, ang bugtong nahabilin sa balay sa iyang mga anak kay ang mga manghod nagduwa sa layo.

Gitawag si Lucia sa iyang amahan aron pasudlon sa kuwarto. Sa sulod sa kuwarto, kalit siyang gihuboan sa shorts ug underwear sa iyang amahan. Didto, bisan sa iyang pag­lugnot ug pagpakiluoy samtang naghilak, nabungol kini gisanapan ang iyang amahan sa yawan-ong tinguha kaniya.

Iyang gibati ang kasakit sa gibuhat sa iyang amahan. Human niini, gibauran siya sa iyang amahan sa di pagsulti ni bisan kinsa aron di siya patyon. Dihang niabot ang iyang inahan, ingon sa wala lay nahitabo kaniya tungod sa iyang kahadlok sa baod sa iyang amahan kaniya.

Nagtuo siya nga mao ra kadto ang kalbaryo nga iyang sagubangon. Apan gikan sa 1994 ngadto sa 1998, gilugos pa siya sa iyang amahan nga way bisan kinsa nga nakahibawo tungod gihapon sa iyang kahadlok.

Nahibaw-an lang ang linuog nga binuhatan sa iyang amahan dihang nimabdos si Lucia sa edad nga 13-anyos. Katapusan nga pag-rape kaniya nahitabo niadtong Enero 1998 ug nianang Oktubre sa samang tuig, nanganak siya.

Sa pagtaral sa korte, niangkon si Isyot nga ilang anak si Lucia sa iyang kapuyo nga si Neneng. Mao kini ang ilang kamaguwangan, Apan nanghimakak siya nga iyang gilugos ang iyang anak ug nga siya ang amahan sa gipakatawo niining bata.

Matod niya nga ang tanang mga pasangil batok kaniya pulos minamao lang. Siya nipasangil nga gisulsolan kini sa iyang bayaw nga iyang nasukmagan dihang sila nag-away. Nisugot sab ang iyang anak kay iya kining nabunalan dihang giapas siya sa tindahan. Iyang nadunggan ang iyang bayaw nga nisulti kang Lucia nga iya ikiha siya og rape.

Motuo ka ba sa depensa ni Isyot nga tumo-tumo lang ang pasangil batok kaniya? Kon sad-an man siya, unsay may silot alang kang Isyot?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph