OPERATIONS manager sa usa ka security agency sa Sugbo ang namatay human ang iyang gimaneho nga motorsiklo gidaro sa Toyota Fortune ug napasok sa ilawom sa sakyanan.
Ang aksidente nahitabo sa dan A.C. Cortes, Barangay Cambaro, dakbayan sa Mandaue kagahapon sa alas 6:00 sa buntag.
Nakabsan sa kinabuhi mao si Nicomedes Noblesa, hingkod ang pangidaron.
Samtang, ang nagmaneho sa Fortuner nga nagdala sa plate number YGE-890 mao si Brian Christopher Toledo, 28, taga-barangay Subangdaku dakbayan sa Mandaue.
Base sa pasiusang imbestigasyon sa Mandaue City Traffic Division, giingong nikawat sa pikas lane ang Fortuner nga gimaneho ni Toledo.
Wa na makabawi si Toledo sa dihang diha na sa iyang atubangan ang motorsiklo hinungdan nga iya kining naligsan ug didto na makuha ilawom sa Fortuner si Noblesa ug ang nalukot niini nga motorsiklo.
Dali nga gidala ang biktima sa Mandaue City Hospital apan nakabsan gyud sa iyang kinabuhi sa dihang gitabang sa mga mananambal.
Gikataho nga grabe ang naangkon nga kadaot sa nagkadaiyang parte sa iyang lawas.
Si Toledo, kinsa nagpaila nga usa lang ka drayber sa Toyota Fortune, gibalhog sa detention cell sa Police Station 5 ug kasong reckless imprudence resulting to homicide ang hayan atubangon niya sa korte karong adlawa.