DILI ikatingala ang pagkasikop sa duha ka mga personahi sa LTO atol sa entrapment operation sa CIDG nunot sa reklamo sa motorista nga pagpangilkil.

Dili sab ikatingala kon mohimakak kini sila si Edgardo F. Arafol ug Napple Jun U. Moralde sa pasangil batok nila.

Sa umaabot pa nga operasyon sa CIDG, kon mokugi sila, dili sab ikatingala nga mas daghan pang mabisyo ug madakpan nga mga mangilkilay.

Kini bitawng unipormado nga mag-motor ug kotse nga mag-atang sa highway kadudahan kaayo labi na kon medyo may pagkatago ilang nahimutangan. Mokalit lang og gawas sa karsada unya mopara dayon sa mga motorista.

Ang general rule bitaw sa paghimo og check point mao nga dunay dagkong traffic sign ipahimutang sa karsada - ehemplo niini, kon PNP naghimo sa check point - dunay pahibawo nga PNP checkpoint. Unya visible sila sa karsada - nagpasabot makita gyud sila, unya unipormado.

Kon hingusgan lang kining kampaniya batok sa mga unipormadong mangilkilay, subayon nila kining highway gikan sa siyudad paingon sa Bukidnon o bisan asang highway makita gyud nila kining nag-atang-atang sa karsada.

Nakagamot na kining problema ug daghan nang mga motorista nga nangabiktima.

Gihimong gatasan kining mga negusyanti nga kanunay nagbiyahi ug ang mga ordinaryong motorista.

Nganong nakasulti man ko ana. Gamay pa ko kanunay ko nagbiyahi gikan sa Aurora paingon Pagadian, Ozamis ug sa Iligan. Halos matag lungsod dunay checkpoint ug kada checkpoint dunay itunol sab ang drayber nga akong gisakyan. Kon isda iyang karga, isda sab ang ihaylo. Usahay di pa kontento ang checkpoint, mangayo pa og pang-inom. Unya gawas sa checkpoint, naa pa ning nag-atang sa ngilit-ngilit nagpaabot og tukbonon.

Dili unya ta matingala kon dunay sakop sa RTA o PNP nga nag-operate sa dakbayan ang mabisto usab sa pagpangilkil.

Busa, kadtong mga kotong boys, Sir, undanga na inyong mga pasaway. Buhia inyong pamilya, o kon duna moy kabit, buhi sa limpyo nga paagi. Dili baya lalim kon moabot na ang gaba sa inyong binuang. May panahon pa nga mag-usab.