DEAD on arrival ang 22 anyos nga sakop sa Citizen Armed Force Geographical Unit (Cafgu) samtang kritikal ang igsuon niini human giluba niadtong Domingo mga alas 7:30 sa gabii sa lungsod sa Claveria, Misamis Oriental.

Gideklarar sa mga doktor nga patay si Jerome Cabellon, ulitawo samtang kritikal ang kondisyon sa igsuon niining si Joey, 25, mga residente sa Barangay Patrosenio susamang lungsod human gipangdala sa Northern Mindanao Medical Center (NMMC) ning siyudad sa Cagayan de Oro mga alas 8:30 sa gabii.

Usa sa paryente sa biktima nga nahinabi sa Sun.Star SuperBalita niingon nga blanko pa sila sa hinungdan sa kamatayon ni Jerome labina wala sila sa lugar atol sa insidente.

Apan sa inisyal nga imbestigasyon sa kapolisan sa Claveria Police Station nasayran nga nag-inom sulod sa usa ka balay kalingawan ang mga biktima ug nakalalis ang usa ka babaye sa maong dapit ngadto kang Jerome.

Adunay kuyog nga wala mailang lalaki ang babaye nga milaban niini nga maoy responsible sa pagpangluba niadtong tungora gamit ang kutsilyo.

Giluba ang dughan sa biktima ug kilid nga bahin nga gituohang naigo ang kasing-kasing hinungdan sa hinanaling kamatayon.

Samtang si Joey nga wala makatan-aw sa gihimo sa iyang manghod ang niaparta ug gisuklan ang suspek apan giapil kini pagluba sa tiil nga bahin nga miresulta sa pagkaputol sa ugat nga bahin sa tiil niini.

Human sa hitabo dali nga misibat ang mga suspetsado uban sa wala gihapon maila nga babaye.

Ang patayng lawas gidala na sa puloy-anan samtang si Joey nagpabilin pa sa emergency room ning panahona.

Ang kapolisan nihimo na og man hunt operation aron pagsikop sa suspetsado ning panahona. (Stephanie V. Berganio)