BUHI pa ang mangtas nga "Buak Kotse Gang" (BKG) dinhe sa siyudad sa Davao ug wa pa nasumpo sa kapulisan mao nga padayong 'naghasik ng lagim' ngadto sa mga motorista.
Sa ala 1 sa hapon niadtong Sabado, giparada ni Engr. Antonio Yasay, 49, usa ka kawani sa kagamhanan ug nagpuyo sa dakbayan sa Koronadal, South Cotabato ang iyang Nissan Terrano nga sakyanan sa dalan Ponciano Reyes ning siyudad sa Davao sa pagtuo nga way mahitabo tungod kay adlaw'ng dako ug daghan ang mga tawo nga lumalabay sa lugar.
Apan murag asiwang nga naglantaw sa ilang biktima, mitulo ang laway sa mga sakop sa BKG, gibuak ang salamin sa sakyanan ni Yasay ug gikuha ang iyang mga gamit. Naka-igo na sab ang mga tabaghak!
Kaniadto mga sakyanan nga gi-parking sa mga malls maoy tirada sa mga miyembro sa BKG apan gituohan nga wa na kaayo sila maka-operate didto kay gihigpitan karon og bantay sa mga sekyu ang ilang parking area.
Tungod niini, mga behekulo na sab nga nagparada sa daplin sa mga kalsada maoy tumong sa mga bungoton.
u00a0Bililhon dinhi karon ang mga pulis nga naka-sibilyan nga mag-foot patrol. Kun tumanon sa mga pulis kadtong gisugo ni vice mayor Rody Duterte nga mga pulis nga naka-sibilyan mag-foot patrol hayan nga masikpaw kining mga kawatan.
u00a0Mga pulis nga anaa lang sa opisina nag-tambay mas maayo nga pagawson ug suguon nga maniid sa mga kawatan, ilabi na kining mga sakop sa BKG aron mapanalipdan ang katawhan ug masumpo ang ilang dautang buhat.