HUMAN sa ilang makabungog nga pagpakahilum, last Sunday, mihatag na gyud sa iyang pahayag ang TV host nga si Pia Guanio labot sa isyung nagbuwag na sila ni Vic Sotto.

Kapin semana na sab nga blangko ang tanan kun unsa ba gyud katinuod ang tsika, tungod way mihatag og ginagmay nga kisaw sa matag kampo.

Nadahig na sab isyu ang Brazilian model nga si Daiana Meneses nga sa pa maoy third-party sa panagbulag sa mag-jowa.

Sa Showbiz Central, giangkon ni Pia nga way angay nga kabalak-an ang ilang mga fans tungod okey lamang sila ni Bossing.

Wala gilimod sa TV host nga may ginaagian gyud sila nga problema karon sa jowa.

Wala sab kapugong si Pia sa paghilak, dihang gihulagway niini ang estado karon sa ilang relasyon ni Vic, niya, daw sama kini sa usa ka building nga "underconstruction."

Giklaro sab sa dalaga kun nganong galikay-likay siya sa pagtubag sa isyu.

Sumala pa, mas gipili niyang mobakasyon una aron makahuna-huna.

"I want us to fix it muna," ni Pia.

Samtang sa usa ka phone interview, miuyon si Bossing sa mga pahayag nga gibuhian sa iyang partner.

Bisan og giagi sa pakatawa ni Vic ang pag-isplikar sa giagiang unos nila karon ni Pia, di gihapon kalikayan nga mahimo siyang emosyonal.

Ni Vic, gipaningkamutan nila nga ma-settle pa ang ilang relasyon.

"It's not something na hindi kayang ayusin," say sa komedyante.

Hangyo sab ni Vic nga di hatagan og malisya o dautang kahulugan ang ginagmay nga awayan sa usa ka relasyon.

Sila Vic ug Pia lima ka tuig na sab ang relasyon.

Daghan gihapon ang naglaum nga mabalik pa ang kanhi tam-is nga relasyon sa duha, luyo sa gisagubang nila nga suliran karon.