KAUSWAGAN, Lanao del Norte -- Upat ang namatay sa pagbangga sa bus sa Rural Transit Mindanao Inc. (RTMI)
ug usa ka pasahero nga van niadtong niaging adlaw sa National Highway sa Purok 7, Tacub, Kauswagan,
Lanao del Norte.
Ang namatay mao sila Hilbert Legarte Barnido, 23, ulitawo, driver sa van, taga-Sta. Cruz, Kapatagan,
Lanao del Norte, kinsa gideklara nga dead on the spot; Rocel Jay Igot Baring, 18, ug Sarrah Jane S.
Langga, 20, dalaga, mga residente sa Kapatagan, kinsa pulos mga gideklara nga dead on arrival sa usa ka
pribado nga tambalanan sa Iligan City; ug usa ka Felix C. Saoral, 62, minyo, lumulupyo sa Linamon, Lanao
del Norte.
Gikataho nga sila si Baring ug Langga mopauli na unta ngadto sa Kapatagan gikan nag-apply og trabaho sa
Iligan City.
Sa imbestigasyon sa kapulisan, kusog ang dagan sa RTMI bus nga gikan sa dakbayan sa Pagadian paingon
unta sa Cagayan de Oro City dihang kalit nabangga sa katagbo nga van.
Miingon ang mga pasahero sa bus nga sila si Jaime Tuloy Tawan ug Antonio Panteras Tamala nga gawas sa
kusog kaayo nga padagan sa driver nga Melvin F. Dandasan, naggamit pa kini sa iyang cellphone aron mo-
text.
Human mabangga sa nagdagan nga van ang bus, didto kini mibangga sa puno-an sa lubi sa wala nga bahin na
sa iyang direksiyon.
Daling mikanaug og midagan ang driver, apan didto na kini mi-surrender sa police station sa Naawan,
Misamis Oriental.
Miingon ang mga pasahero sa van nga igo-igo lang ang padagan sa driver apan kalit nga gibanggaan sa bus.
Ubay-ubay usab ang angol sa maong insidente.