ANG City Health Office (CHO) sa siyudad sa Digos naghuwat kanus-a ipagawas ang ilang gipangayo nga badyet aron nga masugdan na ang pagpamalit og dugang fogging machine ug fogging chemicals nga gamiton sa pagsumpo sa dengue.

Ang CHO nangayo og P1.8 milyones nga badyet alang sa ilang mga proyekto aron mapugngan ang dugang pagkuyanap sa sakit nga dengue ingon man ang pagsud sa gikahadlokang malaria.

Kahinumdoman nga gipailawom sa state of calamity ang probinsiya sa Davao del Sur human niabot sa 14 ang namatay ug padayong nisaka ngadto sa kapin 600 ang mga natakbuyan og dengue sud ning bulana.

Nabalaka na kaayo ang CHO nga madugangan pa ang ihap sa ilang mga pasyente sanglit sa siyudad nahitala ang pinakataas nga kaso, 352 ug 9 na ang namatay.

Si Dr. Milagros Sunga, City Health Officer, niingong kinahanglan nila ang mao nga kantidad aron magamit sa pagpalit og tambal sa mga natakbuyan og dengue.

Dungan niini, mga ginsakpan sa CHO miadto na sa mga nagkadaiyang barangay aron awhagon ang katawhan nga manglimpyo sa ilang palibot.

Sukad niadtong adlaw'ng Sabado, nibundak ang kusog kaayong uwan sa Davao del Sur ug hangtud karon nagpundo pa ang tubig kay wa pa nihubas ilabi pa sa mga baradong kanal mao nga angayang mohimo og lakang ang katawhan bahin niini aron nga mapakgang ang pagpangitlog sa mga lamok. (Dondon Dinoy)