NAGKUHA ang ALA Promotions og usa ka ekspertong conditioning coach alang kang Rey “Boom-Boom” Bautista, kinsa nakaeskedyul nga moaway karong Agusto 28 sa Waterfront Hotel sa Lahug, Cebu City batok sa wala pa matino nga kontra.
Hinuon matod ni ALA Promotions president Michael Aldeguer nga wala pa nila ma-finalize ang tanan kabahin sa ilang pagkuha kang Pio Gerardo R. Solon, usa ka US certified sports conditioning coach.
“He’s a graduate from UP (University of the Philippines) and I think duha lang ni sila sa Philippines nga nakakuha’g certification sa US in this field,” matod ni Aldeguer.
Gipasabot ni Aldeguer nga nakahukom sila niini gumikan kay mao na gyud kini ang kasagaran nga gipanghimo hilabi na sa gawas sa nasod.
“Naa na man ta’y program para ani but we want to enchance our knowledge in this field. Internationally, everyboby is going in this direction,” matod ni Aldeguer.
“Even Manny Pacquiao, he has a good conditioning coach aside from Freddie Roach.”
Nidugang si Aldeguer nga lahi na gyud ang pamaagi sa pagkakaron gamit ang bag-ong teknolohiya kabahin sa pagpakondisyon sa mga atleta.
“Sa basketball, ang atong players sayon na lang makahansak tungod sa maayong conditioning. We want to see kon unsa’y mahimo ani para sa atong boxers,” dugang ni Aldeguer.
Kabahin sa kontra ni Bautista, nagkanayon si Aldeguer nga padayon pa silang nakignegusasyon.
Wala pa gyud sila’y nakit-an apan gipaneguro ni Aldeguer nga usa gyud ka Latin American boxer ang ilang iparang sa lumad nga taga Candijay, Bohol.