NAUNSA na ni? Ipadayon ni Mayor Mike Rama ang pagbaligya sa Cebu City Medical Center (CCMC)? Abi nako og duna nay daghang pundo ang Syudad sa Sugbo tungod sa pagpamunga na sa South Reclamation Project (SRP)?

Nakalimot na tingale si Mayor Rama nga ang iyang baruganan kaniadto mao man ang pagpalambo sa CCMC ug di pagbaligya niini. Nakahibawo na baya kita nga wa siya mouyon na sa proposal ni kanhi mayor Tomas Osmeña nga ibaligya na lang kining CCMC.

Updates on President Benigno Aquino III's presidency

Kay barato ra man ang bayranan sa pagpatambal sa maong hospital, daghan kaayo ang pasyente labi na kining gikan gyud sa labing kabus nga siguradong di mahimong magpatambal sa mga pribadong hospital tungod sa kakulang sa kuwarta.

Gisulayan na gani ni Osmeña ang palisiya nga mga taga Syudad sa Sugbo lang ang dawaton sa CCMC ug bahala na ang VSMMC nga maoy mo-accommodate sa mga pasyente sa lalawigan.

Imbes pangitaan na karon og pundo ang CCMC aron mahimong viable kini, oy, ipabaligya na man sab. Nagsalig lang nga layo pa ang eleksyon.

WAY PUNDO?

Pero, on second thought, nakaingon ko sa akong kaugalingon nga basin og atik ra gyud kadtong giingon sa Bando Osmeña-Pundok Kauswagan (BO-PK) nga duna nay igong pundo ang City Hall kay nganong ibaligya na man sab ang CCMC?

Gani, sa sektor sa kabatan-onan, wa man sab diay ideposito sa City Hall ang pundo alang sa mga gradweyt sa high school sa public schools.

Nagkabuang intawon ang mga beneficiaries sa City Hall sa papangita og ikatapal sa kantidad aron makakuha og midterms.

Duna say nakasulti kanako nga bisan ang mga senior citizens, wa na makadawat sa gisaad nga hinabang human sa piliay.

Unsaon nga kadtong mga saara panahon sa kampanya, aron ra man gyud kadto nga mosuporta ang mga botante. Karon nato makumpirmar nga pangatik ra gyud diay.

BALSSY

Tungod sa atong paghisgot niining pagtudlo kang Customs Commissioner Joselito Alvarez sa miaging mga lindog, duna kitay kaila nga nitug-an kanato nga dunay daghang mga panghitabo didto sa kaulohan diha mismo sa mga suod ni Presidente Noynoy Aquino.

Usa niini mao ang giingong kasuko sa igsuon ni Presidente Aquino nga si Balsy kay ang nagduso sa ngalan ni Alvarez diha sa selection committee wa maghisgot kabahin sa isyo nga pagpanikas diha sa Mango Tee golf tournament sa Alabang Country Club.

Kalit lang kuno kini nga nibuto sa ilang mga nawong human natudlo si Alvarez sukwahi sa giingong nahisgutan pagmaayo sa pagpili pa lang ang maong isyo.

Di kita maka-confirm dayon niini apan klaro nga ang maong isyo makauulaw kaayo labi na sa ilang mga tigsuporta nga nagtuo nga seryuso ang kampanya batok sa mga kurakot. Si Presidente Aquino mao na karoy gisaway nga wa diay gyud makahibawo kon unsay buhaton ug nag-trial and error.

Alang kanako nga naglaom nga maka-deliver si Presidente Noynoy sa iyang mga saad, nagtuo ko nga kinahanglan na gyud nga buhian kini si Alvarez kay sa magdugay pa kini ug makadaot pagsamot sa imahen sa presidente.

Nakahibawo na man kita dakong asset ni Presidente Noynoy ang pagtuo sa katawhan kaniya. Importante nga di kini mawagtang tungod lang sa pagtulod og opisyal nga sama kang Alvarez.