WAY basi. Ang MCIAA Board dunay kasinatian nga ang paghatag og pabawon sa miyembro sa MCIAA Board gibalibaran na sa Commission on Audit (COA) tungod kay way legal nga gipasikaran.

Ang COA midumili sa paghatag og P100,000 kang Carina Sepulvida Valera, nga miretiro nga miyembro sa MCIAA board tungod kay undersecretary siya kaniadto sa Department of Transportation and Communication (DOTC).

Updates on President Benigno Aquino III's presidency

Sa ato pa di na bag-o ang sitwasyon ni Patria Roa, ang retiradong regional director sa Department of Tourism (DOT), diin nahimong dakong isyu karon ang iyang pagdawat sa P500,000 nga gipabawon sa MCIAA Board.

Si Roa nakalingkod nga miyembro sa MCIAA Board ngan nga representante sa DOT tungod kay ang iyang opisina (DOT) man ang miyembro sa MCIAA Board.

Nabulgar ang maong dakong pabawon kang Roa tungod kay nahibaw-an sa mga empleyado ug mireklamo sa kadako sa kwartang gihatag ni Roa samtang silang mga empleyado wa pa pausbawi ilang sweldo.

Dako gyud tingale ang kontribusyon ni Roa sa kalamboan sa airport kay gipabawnan man siya og dakong kantidad.

Apan pung pa ni Cong. Pablo Garcia, amahan ni Gobernador Gwen, nga way dautan ang paghatag pabawon ni Roa.

Apan di ni nato sabton nga way nahimo si Al Alerre ngan nga general manager kaniadto sa MCIAA tungod kay wa man siya hatagig pabawon sama kadako sa gihatag kang Roa.

Apan mapasigarbohon si Alerre nga miingon nga wa siyay nadawat bisag piso gikan sa MCIAA pagkahuman sa iyang termino nga general manager bisag nakadawat og pasidungog ang MCIAA gikan sa Federal Aviation Administration (USA).

Tungod sa makabungog nga isyu, ang Ombudsman nagsugod na sa ilang pakisusi. Kon ako ang pasultion, di na man angayan pang susihon pa sa Ombudsman tungod kay gibalibaran na man sa COA ang P100,000 nga gihatag kang Valera.

Ang ubang kongresista dinhis Sugbo nga di sinati sa RA 6958, ang MCIAA charter, midumili paghatag og reaksyon. O, di ba nangahadlok lang silang makigbangi ni Gobernador Gwen, nga maoy tsirman sa MCIAA.

Apan si Kong. Rachel “Cutie” del Mar miingon nga mas maayo unta kon ang MCIAA Board misubay lang sa balaod. Si kaniadto Kongresista Raul, amahan ni Kongresista Cutie, mao ang nagpanday sa RA 6958.

Matod pa ni Kongresista Cutie way probisyon sa MCIAA Charter nga mohatag og severance pay o pabawon sa miyembro sa MCIAA kon moretiro sa trabaho. Ang madawat lang sa miyembro sa MCIAA mao ang per diem matag meting.

Gidepensahan ni Gobernadora Gwen ug ubang miyembro sa MCIAA board nga ang paghatag og P500,000 nga pabawon kang Roa basi sa ilang board resolution agig bayad sa serbisyo ni Roa sa MCIAA.

Mogawas nga makaduha modawat si Roa og pabawon sa iyang pagretiro ngan nga empleyado sa DOT diin makadawat usab siya sa mga benepisyo. Sa ato pa di lang ilegal, imoral pa gyud ang iyang pagdawat sa P500,000.

Ang di masabtan sa katawhan nganong gipugos sa MCIAA Board ang paghatag ni Roa og dakong pabawon nga nakahibawo na man sila sa kaso ni Valera nga wa gi-aprub sa COA tungod kay way basi.

“Judgment call” ra gyud ang nahimong explikasyon sa gobernadora ug sa iyang mga kauban sa MCIAA. Unsa may ipasabut anang ilang giinong nga “judgment call”? Igo na ba ni nga rason aron iwaldas ang kita sa airport? (elespinoza53 @yahoo.com)