SA uwahing pagbisita sa dakbayan sa Tagbilaran, kuryusong nangutana ang Superbalita sa usa ka babaye kon nganong sa Tagbilaran ug dili sa Cebu man siya nanrabaho.
Ang babaye kinsa anaa na sa iyang hamtong nga pangidaron dali ug yanong mitubag, “maayo man diri, Sir, kay bisan ug magpa-load ka og magabii sa pikas eskina, di ka kuyawan maglakaw. Linaw ang imong hunahuna.”
Giusban pagpangutana. Sa Cebu diay?
“Sa mga balita lang daan, Sir, kada adlaw panguyawan na ka. Manglibawot imong balhibo inig paminaw nimo sa radio ug tan-aw nimo sa mga balita sa TV.”
“Tulis. kon di patay, kon di lugos, pinusilay, dinunggabay, gubat sa mga batan-ong gang ug uban pang madugoon nga panghitabo, mao lay imong mabalitaan,” saysay sa maong babaye.
Bisan kita dinhi sa Sugbo di nato malimod ang gisaysay sa babaye. Taliwala ning pagpanghambog sa atong mga kadagkuan nga malambuon ang Sugbo, nagpahipi ang bangis nga panghitabo nga nagdala og hulga sa kinabuhi ug kabtangan sa mga tawo.
Makahuloganon ug sabtunon kaayo ang unod ug mensahe nga gibutyag sa maong babaye kinsa dili taga Bohol apan sa maong dapit nanimpad sa iyang ordinaryong panrabaho.
Kining maong mga panghitabo maoy nagdala og lama sa imahe sa Sugbo. Makadaot ilabi na sa industriya sa turismo. Ang Sugbo kaniadto dili na sama sa Sugbo sa karon. Ang kalinaw nga maoy gitamod sa mga kanhiayng higayon, nagusbat na ug gipatugbabawan sa mga lampingasan nga panghitabo.
Hinaot pa unta nga kini kahatagan og igong pagtagad sa atong mga kadagkuan, ilabi na sa mga kapulisan, mintras di pa uwahi ang tanan.