Donzkie B. Aton
Bagtik, San Remigio, Cebu
KINING estoryaha bahin nis akong amigo nga sipat. Gawas nga tsikboy, palikero pa gyud.
Suma pas iyang hinubay, diha kunoy tulo ka managsuong babaye nga kaliwat og Katsila ang iyang gipanglumpong. Napaksitan ra ba gyud kuno niya ang tanan. Natuhog.
Aw, dili na lang unta ta mahibulong kon guwapo ug matso pa untang tawhana. Pero ang nakadalag tanghaga kay maingon tang pulonga, daginuton man kaayog nawong tawhana.
Agtang pay imo nga taas kaayog hilam-usanan, puyra buyag natawo sa ting-kuwaresma.
Nanay ra gyud niyay makadayeg. Dugang pa niya, nakatira pa kuno siyag biyuda, minyo, burikat. Ug diha kunoy kas-a atol sa pista sa ilaha, nakatilaw pa kuno siyag babaye nga birdyen pay imburnal.
Mao lagi, tungod tingalis kahimuak niyag pakwan maong dugay naminyo tawhana. Ang nakademalas kay sayo kaayong nabiyudo. Nabinlan tawon og duha ka buok anak sa mitaliwan niyang asawa. Kaluoy lagi. Hinuon, nagbag-o na siya.
Ang iyang kinabuhi, ang iyang gugma didto na itingob og bubo sa iyang duha ka mga anak.
Pero dihay kausa samtang nahiagi siyas amoa ug nataymingang nag-washing kos bag-o nakong Honda Wave, nangayo siyag tambag nako.
“Unsa kahay mayo, Bay, magminyo kaha kog usab aron naay makaatiman sa akong mga anak?
Gagmay pa man god sila kaayo!”
“Kon ako pay ikaw, Bay,” tubag ko, “dili na lang ko magminyog usab, uy. Uroyg daugdaugon pa lang imong mga anak. Kundili, simbakog igo ra unya kang hukhokan.
Angay pabalik na ka, Bay, dili kay mo-enter pa hinuon anang relasyon-relasyon. Kon pananglit mingawon kas dugos ni Eba, aw, anha lang anang bag-ong Mangga god. Inigbuto, bayad.
Aw, wala nay laing obligasyon.”
Pero gipalapos lang tingali niya ang akong mga maymay kay buwan lang kapin ang nakalabay human niadto, aduna na man kiniy kaipon. Ug usa ka hapon niana samtang nagkalingaw kog pamubo sa mga banda sa akong misis, nahilabay siya uban sa iyang asawa kunohay.
“Unya, Bay,” mihunghong gyud siya nako, “unsa may imong ikasulti, guwapa no?”
Apan sa paglabay lang sa duha ka buwan kapin, matod pa sa mga taga Radyo-Baktas, milayas kuno ang asawa-asawa sa akong amigo, ug gilakip pa kunog dala niini ang puhonan niyas iyang negusyo nga inutang sa Taytay. Hastang alkansiyang hamabaw na unta
ang sulod.
USA ka sayos buntag nahilabay siya sa amoa. Mibakig og mayo ang iyang lawas. Guba kaayog nawong.
“Unya, Bay, unsa may imong ikasulti?” matod ko.
Mihunong siya. Hinay siyang miling nako. Sa iyang postura nakita nako ang bagang duot sa dag-om ug ang inanayng pagtaligsik. (KATAPUSAN)