LALAKE nga gituohang responsable sa sunodsunod nga kawat sa ilang dapit sa dakbayan sa Lapu-Lapu gipusil patay dihang mopalit na unta siya og bino.
Kini nahitabo sa sityo Ibabao, barangay Agus, niadtong Dominggo, pasado alas 6:00 sa gabii.
Ang biktima giila nga si Jing Deiparine, 23, ulitawo, apan dunay live-in partner, usa ka production worker.
Sa imbestigasyon sa kapulisan, ang biktima nag-inom uban sa iyang mga higala.
Nananghid siyang mo-advance sa iyang suweldo aron ipalit og bino.
Apan wa pa gani makaabot sa tindahan nga iyang palitan, duha ka wa mailhing mga tawo ningpusil sa biktima maka-upat ka mga higayon.
Ang biktima naigo sa nagkadaiyang bahin sa iyang lawas.
Usa ka batan-on ang bulontaryong nihatag og kasayuran sa kapulisan ug nihulagway nga ang mga killer nagpangidaron og 30 ngadto sa 35 anyos samtang ang laing 30 ngadto sa 40 anyos ang panuigon.
Basi sa diskiripsyon nga gihatag sa nakasaksi natukma kini sa usa ka lumolupyo sa dapit ug sa laing silingan niini.
Ang mga sakop sa homicide section ug SWAT niadto sa balay sa duha apan wala moabli sa gate.
Sa nakuhang kasayuran sa kapulisan ang biktima maoy gituohang responsabli sa pagpangawat sa mga electrical wire nga gitaod sa ilang dapit sa wa pa kini makakitag trabaho.
Nakuha sa kapulisan gikan sa crime scene ang duha ka mga kabhang sa 9mm pistol, samtang ang lawas anaa saa local nga punerarya sa siyudad.
Ang kapulisan padayon pa sa ilang gihimong inbestigasyon kon ang ilang nakuhang ngan sa killers mao ba gayod sanglit wa man silay klarong saksi nga motumbok sa ilang gidudahan. (DRT)