MAG-ATUBANG og kasong kriminal ang pulis nga giingong nipainom og ilimnong makahubog sa usa ka bata nga gipremyohan niyag P20 atol sa adlawng natawhan sa iyang anak nga babaye sa miaging tuig.
Si PO3 Noel Monares girekomendar sa Cebu City Prosecutor’s Office nga pasakahan sa kasong kalapasan sa child abuse nga nalatid sa Republic Act (7610) tungod sa hitabo, diin ang mga bata premyohag P20 kon moinom og “The Bar”.
Aduna usa ka bata nga nagpangedaron og 10 ang nituman sa awhag ni Monares nga niinom sa ilimnong makahubog nga niresulta sa iyang pagkalipong, nagsuka ug nadala sa tambalanan.
Mamahimo rang gawasnon ang pulis samtang husayon ning kaso nga iyang giatubang kay pwede siyang makapiyansa sa kantidad nga P80,000.
Nirekomendar ang piskaliya nga pasakahan og kaso si Monares sa korte apan siya nisang-at og motion for reconsideration nga ibasura ang pasangil nga gisang-at batok kaniya apan wa kini hatagig gibug-aton sa piskaliya.
Nisaysay ang biktima nga nitambong siya sa birthday party sa anak ni Monares apan gipalinya sila sa pulis unya giingnan sila nga kinsa kadtong moinom og “The Bar” hatagan niyag P20.
Nitumbok siya nga duha ka higayon nga niinom siya sa ilimnong makahubog ug gihatagan siyag kwarta apan nahubog siya ug nisuka dayon gidala siya sa tambalanan.
Human sa insidente, nasuta nga ang biktima nahadlok na sa pulis ug di siya gusto nga magkakita sila niini.
Di na gani siya gusto nga moagi sa balay nga gipuy-an niini.