USA ka lalaki ang naangol sa granadang mibuto sa alas 7:00 sa gabii niadtong Lunes didto sa probinsiya sa South Cotabato.

Nailhan sa kapulisan ang samdan nga mao si Elmer Asan, 41, minyo ug molupyo sa siyudad sa Tacurong.

Gibutyag ni SPO4 Reynaldo Leonico nga dunay mga tawo nga nag-inom sa bay ni Elmer Advincula, tribal chieftain sa South Cotabato sa Barangay Lampitak, Tampakan.

Sa diha nga nangahubog na, kalit nga nagkalalis ug nagkasinumbagay. Maayo na lang kay nauwang sila sa mga nirespondeng mga barangay tanod.

Apan pagkagabii, mibalik ang duha ka tawo nga nasumbagan nga naila nga sila Arnel Dasan ug usa ka alyas Jayjay, ug kalit nilang gi-itsahan og granada ang pinuy-anan ni Advincula.

Maayo na lang kay didto nutugpa ang granada sa kilid sa sementong pader ug usa lamang ang nasamdan.

Dali sab nisibat ang mga suspek sakay sa motorsiklo paingon sa wala matino nga direksyon.

Gidugang ni SPO4 Leonico, sakop sa Tampakan PNP, nga dunay mga lugar na silang gisusi karon nga posibling gitagoan sa mga suspetsado. (Edgardo Fuerzas)