DUHA ka tawo ang angol human nabalintong ang ilang gisakyang motor didto sa National Highway, Sityo Mampising, Barangay Tagnanan, lungsod sa Mabini, Comval Province, Dominggo sa gabii.

Nailhan ang mga biktima nga mao sila Alberto Pama, 21, ug si Robert Cacinto, ug pulos molupyo sa Barangay Bongbong, lungsod sa Pantukan.

Sa report gikan sa Comval Province Police Provincial Office, nasayran nga nahitabo ang aksidente pasado alas 10:45 sa gabii, sakay sa usa ka Honda Wave nga motor ang mga biktima nga dunay plate number LG-9512 gikan sa lungsod sa Pantukan ug padulong unta sa lungsod sa Mabini. Apan pag-abot sa nahisgutang dapit, nalahos sila sa kurbada nga bahin ug nabalintong.

Nabagnos ang duha ka mga biktima resulta sa pagkahiagum nila og mga pangos ug bun-og sa kalawasan.

Daling gipangdala sa Davao Regional Hospital sa siyudad sa Tagum ang mga biktima aron mapatambalan.

Samtang ang motor nga gisakyan sa mga biktima, gikostudiya na karon sa mga otoridad.

Kapulisan sa lungsod sa Mabini mihimo na og dugang imbestigasyon sa maong hitabo. (Marvin Pineda)