MIANGAL na karon ang mga drayber nga sakop sa Transmission-Piston tungod sa pagsaka sa balayrunon sa pagparehistro sa mga publiko ug pribadong sakyanan hinungdan nga nagprotesta sila atubangan sa buhatan sa Land Transportation Office (LTO) niadtong Lunes.
Sa ilang position paper nga gipadangat sa buhatan ni LTO Regional Director Gomer Dy, gikuwestiyon sa Transmission-Piston ang pagsaka sa Motor Vehicle Users Charge (MVUC), ug ang pagpatuman sa Inspection Fee sanglit dili kini makatarunganon ug wala miagi og proseso sama sa konsultasyon sa publiko.
"The higher fees are additional burden to an already overburdened sector. Drivers have reduced incomes because of the regular increases in oil prices. They contribute so much to the national coffers as milking cows with the increased fines, and now with increased fees. This is really too much," pahayag ni Edil Gonzaga sa Transmision-Piston sa SuperBalita.
Si Gonzaga nagbutyag nga ang MVUC maoy resulta sa Executive Order 197 nga gipaguwa ni kanhi pangulong Joseph Estrada kinsa nagmando sa tanang ahensiya sa gobyerno sa pagpasaka sa tanang balayrunon (fees and charges) ngadto sa 20 porsiyento apan naimplementar lamang niadtong miaging tuig.
Ang maong EO, suma ni Gonzaga, adunay increase nga 25 porsiyento sa unang tuig, 50 porsiyento sa ikaduhang tuig, 75 porsiyento sa ikatulong tuig ug 100 porsiyento sa ikaupat ug sa mosunod nga mga tuig.
Si Gonzaga nagbutyag nga ang nasud dunay kapin unom ka milyon ka mga nanag-iya og sakyanan diin ang LTO mokita og duha ka bilyon ka pesos matag tuig, mas dako kaysa gikolekta kaniadto nga Radio Frequency Identification (RFID).
Ni Gonzaga, dili makatarunganon ang pagsaka sa MVUC diin kaniadto ang tricycle mobayad lamang og P300 apan ning kasamtangan mobayad na og P2,000 ang tag-iya ngadto sa LTO. Samtang ang PUJ, suma ni Gonzaga, kaniadto mobayad lang ang tag-iya og P900 apan karon misaka na ngadto sa P2,000.
Sa laing bahin, gipatuman sab ang Inspection Fee ngadto sa mga tag-iya og publiko ug pribadong sakyanan sa panahon nga ilang irehistro o i-renew ang registration sa ilang mga sakyanan.
Si Gonzaga nagpahayag nga ang Inspection Fee kinahanglan mobayad ang tag-iya sa sakyanan og P150,00 alang sa motorsiklo nga dunay sidecar, P300 alang sa PUJ ug P600 alang sa mga bus.
"There is no standing order or law, but is implemented nationwide," ni Gonzaga, kinsa midugang nga natahap ang ilang pundok nga ang maong increase maoy laing tinubdan sa kurapsiyon. (AD)