NANGHILAM-OS og kasaba ug pagsaway sa katawhan ang Philippine Atmospheric and Geophysical Asthronomical Service Administration ( Pagasa ) tungod sa sayop nga forecast sa bagyong Basyang nga niigo dinhi sa Pilipinas sa miaging semana.
Nasayop man gud ang pagbanabana sa Pag-asa sa direksyon sa bagyo nga di moigo sa Metro Manila. Paet kay mao man diay rombo sa bagyo nga maoy hinungdan sa grabing kadaot ug miresulta sa kamatayon sa dul-an sa usa ka gatos ka mga tawo kay waman makapangandam.
Nawad-an gud ug pag-asa sa Pag-asa ang mga biktima tungod sa maong panghitabo. Karon mitumaw ang mga pangutana: Kinsa may atong saligan sa paghatag ug tukma nga taho sa kahimtang sa panahon?
Gawas nga karaan na kaayo ug di pa hitech ang mga kagamitan sa pag-asa nga maoy gibasihan sa ilang mga forecast ang terminong gigamit sa ilang forecaster di naman ta makasalig. Ania ang atong pagbanabana sa lakaw sa panahon niining mga orasa. Mao ni ang ilang intro sa higayon mohatag silag weather update ngadto sa katawhan pinaagi sa media.
Sa akong yanong sugyot mas maayo pa og ila ning wad-on ang terminong pagbanabana. Kay sa akong pagsabot ang pagbanabana way klaro ug di accurate. Samot na kon moingon ang taga Pagasa: ania ang atong taghaptaghap nga taho sa lakaw sa panahon. Paet!
Sa bulilyaso sa pag-asa maayo untag hingpit nang mapatuman ang modernization program aron dina sila magtaghaptaghap kay mahimo na unya nga moderno ang ilang mga gamit.
Manghinaot lang ta nga ang pag-asa sa pag-asa anaa sa mga kamot ni Presidente Noynoy Aquino. Ang presidente usa sa nasuko sa sayop nga forecast sa pag-asa sa pag-igo sa bagyong basyang didto sa Luzon nga wa maapil sa ilang sayop nga pahibawo.
LEKSYON SA KALAMIDAD
Sa tanang higayon maayo tingali nga atong himuon ang mga pagpangandam sa dipa mahitabong kalamidad. Kay bisan pag way bagyo nga miigo sa nasud nahitabo na ang mga pagbaha ug landslide tungod sa pag-uwan.
Mao gani nga atong tuohan ug sundon ang pahimangno sa mga hingtungdang ahensya sa kagamhanan. Sama sa pagbakwit sa mga molopyo nga nagpuyo sa tiil sa bukid ug daplin sa kasapaan.
Ang problema tungod sa kagahi ug ulo sa mga hingtungdan. Ang resulta dunay mga kinabuhi nga makalas kay mawili sa ilang kapanginabuhian. Mao nay ilang giingon nga wanay pulos ang kumpay kun patay nang kabayo.
Karon atong unahon ug seguruon ang atong kinabuhi. Total didto sa mga relocation site di man sab tingale mosugot ang gobiyerno nga mapasmo ang mga kabus natong mga igsuon.
Hinumdomi, daghan pang kalamidad ang atong paabuton ug kun di kita magpakabana posebleng ang nahitabo sa uban mahitabo sab kanato nga atoa na mipanaw sa laing kalibotan.
MARTIAL LAW
Sud ug gawas si Mayor Mike Rama sa iyang sayop nga gag order sa matag department head sa Cebu City Hall nga nagdili sa pag-interview sa mga tigbalita may labot sa mga isyu.
Para nako angkunon nalang unta ni Rama nga sayop ang iyang kamandoan ug dungan sa pagpasaylo. Abogado ang mayor ug nasayod siya nga ang gag order usa ka kalapasan sa balaod.
Tarong ug maayong tawo si Rama mao nga di maayo nga mopatuman siyag martial law sa iyang mga tawo sa City Hall. Paghikaw kini sa katungod sa mga tawo nga buot masayod sa mga kalihukan sa tagsatagsa niini ka mga buhatan.
(efren_lonzon@yahoo.com 09084171222)