TULIAS. Pusil. Patay.

Mao kini ang mga matang sa mga balita nga nagbandera karon sa mga mantalaan, radyo ug telebisyon sa Sugbo.

Kon imong tan-awon pag-ayo ang ngingig nga mga panghitabo sa Metro Cebu ug lalawigan sa Sugbo makahahadlok alang sa usa ka tawo nga mahigugmaon sa kalinaw.

Updates on President Benigno Aquino III's presidency

Apan sama sa nahimo na kini nga ordinaryong balita sa dakong dakbayan nga molabay lang sa panan-aw sa mga bumabasa?

Bisan ang awtoridad modayon lang sa pag-ingon nga “isolated cases” ang mga panghitabo?

Way tino nga paghatag og husay sa matuod nga kahimtang sa kahusay ug kalinaw, kon ubos pa ba kini sa ilang kontrol.

Ning ulahi, pipila na ka drayber sa taxi ang gitulis-patay. Negusyante gibanhigan ug gitulis-patay. Gawas sa nagpadayong mga kaso sa kawat, paregla ug uban pa.

Busa, tataw nga migrabe ang pag-ubos sa kahimtang sa kahusay ug kalinaw sa Metro Cebu ug lalawigan.

Nahimong komplikado ang sitwasyon tungod sa padayong bangi ug inugkatay sa baho sa mga pinili opisyal sa lalawigan.

Nabahinbahin na hinuon kini inay mohiusa sa ilang kusog sa pagsulbad sa mga problema ug pagbatok sa hulga sa seguridad.

Kon di mapalambo ang kahusay ug kalinaw sa Sugbo, seguradong duna kini negatibong epekto sa kalamboan sa Sugbo.

Ang seguridad nga usa sa mga nag-unang konsiderasyon alang sa paglambo sa usa ka dapit, way kabalaka sa pagbubo og puhoan ug pagpalapad sa ilang negusyo.

Hagit sa kapulisan, mga lokal nga opisyal ug katawhan — maghiusa sa pagpalambo sa kahusay ug kalinaw.